Shillong, Ïaïong 08
Hadien ka jingïohpdiang ïa ki jingujor na ki paidbah halor ka jingjaboh bad ka jinglehsih jong ki dukan sha (Dairy) kiba don ha ki bynta jong ka shnong Rynjah, ka Hynñiewtrep Integrated Territorial Orga nisation (HITO) Shillong City ha ryngkat ka jingïatreilang bad ka Dorbar Shnong Rynjah, ha ka 8 tarik u Ïaïong, 2025, ki la leit ban khynra ïa ki katto-katne tylli ki dukan sha ha kaba ki la lap ba kawei ka dukan kaba la tip kyrteng kum ka Rajshree Dairy ka dei kaba jaboh tam namar kam don satia ha kano-kano ka rukom ban lehkhuid.
Ha kane ka jingkhynra, ka dorbar shnong bad ka seng ka la lap ruh ba katei ka dukan sha kam don satia ïa ka laisen khaïi bad ka laisen nongbylla kaba biang bad la lap ruh ba ki don ki nongtrei jong katei ka dukan kim pynbiang satia ïa kino-kino ki kot ki sla ba donkam bad ym tang katta, kitei ki nongtrei ki dei ruh kiba la don dak ha ka aiñ.
Kumta, na ka liang ka seng kala maham tyngeh ruh ïa ki trai dukan ba ki dei ban da talasi bha shwa ïa ki briew ba trei khamtam ki bar jylla namar kine ki bar jylla ki la leh ïa ka Jylla Meghalaya kum ka jylla ban rieh tngen hadien ba ki la leh ïa ki kam sniew sha ki shnong lajong.
U President ka HITO Shillong City, samla Banpyntngenlang Syiemlieh, u la kyntu ïa ki paidbah ba ki dei ban long kiba husiar haba ki leit ban rung bam ha ki dukan jong ki bar jylla namar ki kamra shet ki long kiba jakhlia haduh katta-katta kaba lah ban wanrah bad buh jingma ïa ka koit-ka khiah bad na ka liang ka seng kala thang tala noh shisyndon ïa katei ka dukan.
“Ka khubor sha ki paidbah ka long ba lada phi rung ha ki Dairy sha, phi dei ban long kiba husiar ban bam ïa ki jingbam namarba shapoh ka kamra shet, ka jingjaing ka long kaba shyrkhei bha”, ong u samla Banpyntngenlang.
U la ong ruh ba na ka liang ka seng kan sa leit ban ïakren bad u Chief Executive Member (CEM) ka Khasi Hills Autonomous District Council (KHADC) bad ban leit mih ruh sha ki tnat treikam bapher-bapher kum ka tnat Food Safety kaba dei khmih halor kane ka jinglehsih jong kine ki dukan bam.
