Shillong, Ïaïong 08
U Myntri Rangbah ka Jylla, Conrad K Sangma u la pynpaw ka jingsngewsih halor ka jingshah pyndik ka jaka sumar North Eastern Indira Gandhi Regional Institute of Health and Medical Sciences (NEIGRIHMS), da kaba ong ba ka dei ka kam ka bym lah ban pdiang.
Haba kren ha ka Sngi Ba-ar, u la ong ba wat ha ka por ba don ka jingïaleh thma ruh ki shipai jong kano-kano ka ri kim ju pynjot ïa ki hospital, hynrei ka jingjia dang shen ha NEIGRIHMS ka long kaba sngewsih namar kiba shah ktah kin dei ki paidbah bad ki nongpang.
“Wat ha ka por thma ka don ka jingñiew burom, bad ki shipai jong kano-kano ka ri kim lah ban hiar thma ïa ki hospital. Nga sngewsih bha ban ïohi ba ka jingtreikam jong ka hospital la wan ban tuklar bad kam pher la ka dei ka daw aïu-aïu ruh, haba kut ka sngi lada phi leh ïa kine ki kam, ki dei ki paidbah bad ki nongpang ki ban jynjar bad na ka jingsngew para briew, kane ka dei kaei-kaei ka bym lah ban pdiang”, la kren shai u Myntri Rangbah.
Kane ka jingkren u Myntri Rangbah ka la mih hadien ba ka Hynñiewtrep Youths’ Council (HYC) ka la leit ban ïakhih da ka jingthmu ban khang tala ïa ka kamra treikam u Director ka NEIGRIHMS ha Administrative Block, halor ka jingkynnoh ba u Director u la sngap mynthi ïa ki jingdawa ka seng kaba la ai por shitaïew ban jubab.
“Ki lah ban don ki daw, ki lah ban don ki jingïapher jingmut hynrei ki don ki lynti ban pynbeit ïa ki”, u la ong.
U Conrad u la ong ba lada dei ka Sorkar Jylla, ka Sorkar Pdeng ne kano-kano ka shlem treikam kim ju kiar na ka jingïakren haba mih kino-kino ki mat, bad bynrap ba na ka liang ka Sorkar kumba ka ju leh kan ïai bteng ban ïakren hadien-habud ruh, hynrei ban leit tuklar bad ban shu pynthut ïa ka jingtreikam ka hospital ka dei ka bym pat ju leh mano-mano ruh.
“Ki pulit ki la shim khia ïa kane da ka lynti jong ka aiñ bad ki la dep ban mudui mukotduma, bad katkum ki sakhi kiba ïoh lum ngin sa leh eiei pyrshah ïa ki briew kiba donkti”, la ong u Conrad.
U Myntri Rangbah u la ban biang da kaba u la ong ba ka kam pynksan ban shu leit tuklar ïa ka jingtreikam jong ka hospital kam ïahap satia, namar ki don kiwei pat ki lynti ban ïakren.
