Nongpoh, Ïaïong 09
Ki Nongïalam jong ar tylli ki kynhun ñiah kali kamai ba kynthup ïa ka All Khasi Meghalaya Tourist Taxi Association (AKMTTA) na Meghalaya bad ka All India Goods Transport Workers Association (AIGTWA) jong ka jylla Assam ha ka Sngi Balang ki la shong jingïalang ha Nongpoh ban ïakren pynbeit bad ïasuk noh halor ka jingshah shoh jong uwei u nongñiah kali kamai ka jylla ba la tip kyrteng kum u Iajerlang Mylliemumlong kaba la jia ha ka 7 tarik mynta u bnai ha Khanapara.
Kum ban shu kdew, hadien katei ka jingjia na ka liang ki nongñiah kali kamai ka jylla hapoh ka lama jong ka AKMTTA, ha ka Sngi Ba-ar, ka 8 tarik u Ïaïong, ki la khang pyrshah ïa ki kali kamai na jylla Assam ba kin kamai ha ki jaka pynïeng kali kamai ka jylla kiba don ha ka liang jong ka jylla Meghalaya.
Ban poi sha ka jingïasuk bad jingïabeit, ki nongïalam jong ka AKMTTA lem bad ki jong ka AIGTWA ha ryngkat bad ki nongñiah kali kamai ha ka jingïalang kaba la pynlong ha phyllaw ka ophis u DTO Nongpoh ki la ïoh ban ïakren pynbeit bad ïasuk noh halor ka katei ka jingshah shoh u nongñiah kali ka jylla bad shim ruh ïa ka rai ban thaw syndon da ka komiti kaba kyrpang jong baroh ar kynhun na ka jylla bad Assam ban khmih bad pynbeit lada mih biang kino-kino ki jingjia ne ki jingkulmar hadien habud.
U Biren Sharma, General Secretary ka AIGTWA haba kren ha kane ka sngi, u la pynpaw ba lada don kano-kano ka kajia ne kulmar dei ban poi sha ka miej jingïakren ban ïasuk bad sngewthuh jingmut bad poi sha ka jingbha khnang ba kan ym don kano-kano ka jingeh ne ka jingktah ïa ka kamai kajih jong ki para nongñiah kali la ka dei na Assam ne Meghalaya.
U Bah Ricaldinus Dohling, President ka AKMTTA, u la ïathuh ba ha ka jingshisha na ka liang ka kynhun ka jong u ki la don jingthmu ban pynbeit ïa katei ka huri-hura hynnin ka sngi, hynrei ka jingbym wan mih jong u President katei ka kynhun ñiah kali ka Assam na Khanapara, ka la pynlong ïa ki ban hap khang pyrshah ïa ki kali kamai na ka jylla Assam.
Katba u Bah Balajied Jyrwa, Secretary ka Iaitylli Tourist Owners & Drivers Association (ITODA) u la ïathuh ba kum kine ki jingjia, ki dei kiba la jia na ka por sha ka por bad kyrmen skhem ba lyngba ka jingïasngewthuh jingmut bad ka jinglah ban thaw ïa ka komiti kaba kyrpang jong ki ar kynhun, kata na ka liang ki nongñiah kali kamai ka jylla Assam bad Meghalaya yn lah ban pynbeit bad shimkhia ban ïarap ïa la ki para nongñiah kali kamai haba ki ïakynduh kum kine ki jingjia ha ki sngi bad ki por ban dang wan.
