Nongstoiñ, Ïaïong 09
Ka Khasi Students’ Union (KSU) West Khasi Hills District Unit ha ka 9 tarik mynta u bnai ka la leit ban ïakynduh bad aiti ïa ka dorkhas ha u Deputy Commissioner (DC) ka West Khasi Hills ban pynpaw ïa ki mat jingdawa halor ka thungkam thungjam lyngba ka District Selection Committee (DSC).
Ki mat jingdawa ïa kaba ka KSU ka la leit ban ïakynduh ïa u DC ki kynthup ban pyntip paidbah ïa ka kyrteng Vice-Chairman bad ar ngut ki non-official member ka District Selection Committee.
Nangta, ban wanrah ïa ka rukom treikam kaba shai bad ka bym noh shiliang bad ka por ka dawa ba la donkam ba ki paidbah kin tip ïa kiwei pat ki nongkitkam bad ki dkhot ka District Selection Committee kiba don bad trei ïa ka kam ba kongsan ha ka ban pynïaid ïa ka thungkam thungjam hapoh ka district kumba long kiwei pat ki tnat lane ki committee ba la thung bad ïoh jingsiew na ka Sorkar.
Shuh shuh ban pynlong noh ïa ki ‘Written test’ ba la dep khot ban aplai (advertisement) ha u snem 2020 bad kiwei pat ki snem kiba dang pynsahteng bad ban pynthikna ba ki jingkylli kim dei ban lait tuh, ha kaba ka KSU lyngba ki nongïalam ki la pynpaw ba ha ki snem kiba la dep ka ju ïohsngew ki jingud jingnam ki samla wad kam ba ïa ki jingkylli ym shym la ri kyndong ha ka rukom ba dei, kane ka la pynsuba ruh ba ka lah ban don ka jingkhaïi jingkylli.
U samla Johnfisher Nongsiang, President ka KSU WKH u la ong ba ki samla wad kam ki khmih lynti ïa ka jingkhuid bad ka jingstet ban treikam na ka committee hynrei ka pyndiaw bad pynartatien lada ki kam ki sahkut hajuh.
U la ong ruh ba ka seng ka kwah ruh ban pan jingshai na ka committee la ka don ne em ka por (time frame) jong ka jingkut ki advertisement ba la pyllait paidbah.
Namar kata, u la ong ruh ba da ka jingsngewkhia ka seng ka kyntu ïa ka committee (kaba tang ma ka kaba tip ïa ki examiner bad ïa ka jaka ba don ki jingkylli) ban pyntikna ba u juh u shiah ba thar ïa ka jingmut jingpyrkhat ki samla wad kam un ym thar arsien.
