Shillong, Ïaïong 09
Ka Nongaiktien ka Sorkar kaba dei ruh ka Myntri ba khmih ïa ka kam aiñ, Kong Ampareen Lyngdoh ka la ong ba ka kam ba ïadei bad ka jingdonkam ban pynrung kyrteng bad pynïasoh Aadhaar ka dei ka kam kaba ka Sorkar Meghalaya kam lah ban leh eiei namar ka dei palat ïa ka bor jong ka Sorkar Jylla.
Ka la ong ba ka long kaba bakla ban kynnoh ïa ka Sorkar Jylla halor ka jingdonkam pynïasoh ïa u Aadhaar bad kiwei ki skhim ne jingmyntoi ba la ai da ka Sorkar Pdeng sha ki paidbah nongshong shnong.
Halor ka jingïakhih jong ka Awaken India Movement (AIM) pyrshah ïa ka jingpynïasoh Aadhaar, ka Myntri ka la ïathuh ba ka la shu ïoh jingtip na ka Deputy Commissioner ba ki don ki Seng kiba la mih ban ïakhih pyrshah ïa ka jingpynïasoh Aadhaar sha ki skhim bapher-bapher ba ai sha ki paidbah.
“Nyngkong eh, ka bakla palat ban tynrong ïa kane ka jingeh sha ka Sorkar MDA-I lane MDA-2 lane kino-kino ki seng saiñpyrthei. U Aadhaar u dei uba mih da ka Bill jong ka Parliament bad pynlong aiñ da ka Parliament bad ka jingpynïasoh ïa u Aadhaar ka dei ka kam ba palat ïa ka bor jong ka Sorkar Meghalaya”, la ong ka Myntri.
Ka la ong ba ha u 2016-17, ka Sorkar Meghalaya ka la thoh sha ka Sorkar India ban kyrpad pyllait noh ïa ka Meghalaya na ka jingtreikam u Aadhaar, hynrei ka Sorkar Pdeng ka la shu sngap beit jar jar ïa kane, bad hadien la ïoh jingtip ïa ka jinghap pynïasoh ïa u Aadhaar sha ki skhim paidbah kum ka ration card, job card, bad mynta wat ïa ka MHIS bad kiwei-kiwei kiba syriem kum kine ki skhim.
“Lada phi peit ïa kane ka jingpynïasoh Aadhaar, ki nongshong shnong ki long laitluid ban ym shim ïa kino-kino ki skhim lada ki kwah, hynrei lada phi kwah ban ïoh ration card, MHIS card phin hap ban don ïa u Aadhaar. Lada phi dei ki samla pule ba aplai ïa ka scholarship phi hap ban don ïa u Aadhaar. Kumta ka Sorkar India ka la pyndonkam ïa u Aadhaar kum ka jingpynrung kyrteng, ka syrnot ka ban ai ban ithuh kum ki nongshong shnong ba dei hok ka ri”, la ong ka Kong Ampareen.
