Jowai, Ïaïong 09
U Dolloi ka Elaka Jowai, Ma Puramon Kynjing, u la kular ban pyndam noh ïa ka No Objection Certificate (NOC) ba la ai sha ka ‘Om Om Coke’ kaba thmu ban shna ïa ka Lamp Coke Manufacturing unit hapoh u pud u sam jong ka Dorbar Shnong Wapung Skur, East Jaiñtia Hills District.
Kane ka rai ban pyndam noh ïa ka NOC ka la long hadien ka jingïakynduh jong ki nongïalam shnong Wapungskur ïa u Dolloi ka Ekala Jowai ha ophis treikam jong u ha Jowai ha ka 9 tarik Ïaïong.
U waheh shnong ka Wapungskur, Ma Postling Dkhar, u la ong ka dorbar shnong ka dap da ka jingkmen ba na ka liang u Dolloi u la pynshai halor kane ka kam bad kular ruh ban pyndam noh ïa ka NOC sha katei ka karkhana. U Ma Postling u la pyntip ba ki la ïakynduh ruh ïa u Deputy Commi-ssioner jong ka East Jaiñtia Hills District bad na ka liang u DC ruh u la phah da ka jingthoh sha u Member Secretary jong ka Meghalaya Pollution Control Board, Shillong ban bthah ïa katei ka karkhana ban pynsangeh mardor ïa baroh ki jait jingshna kat bym pat pynbeit ïa kane ka kam.
