Shillong, Ïaïong 09
Ka jingieh khlem pyntrei shuh ïa ka surok ‘Smart Road’ kaba ïaid lyngba ka PCI bad mih mar pyrshah ka ophis jong ka tnat Forest ha Lower Lachumiere, ka la ktah shi kat dei ïa kiba leit ba wan bad ki ophis kiba don ha katei ka bynta.
Ha ka Sngi Balang la ïoh ban sakhi ba kawei ka kali Bolero ka la liat ha kawei na ki thliew kaba don hapdeng ka surok bad kane baroh ka dei na ka daw ba ka tnat ba dei peit ka la shu ieh khlem pyntrei shuh bad shu ieh noh kumto.
Ka jingbym skhem jong ki jingtap kiba tap ïa ka thliew ha shi lynter jong kane ka surok, ka wanrah bad buh jingma kaba khraw ïa ki nongïaid nongïeng khamtam ïa ki kali bad ki ar shaka kiba ïaid na kane ka surok.
Ka jingsynjor jong ki jingtap kiba tap ïa ki thliew ka buh jingma ruh ym tang ïa kiba pyndonkam da ki kali ne arshaka hynrei kumjuh ïa ki nongleit nongwan kiba ïaid na kane ka surok khamtam ki khynnah skul kiba ïaid lyngba na kane ka jaka man ka sngi.
Ka jingkylli ka mih mano ban shim ïa ka jingkitkhlieh lada ka jia kano-kano ka jingjia ba sngewsih tang na ka daw ba kane ka tnat kaba peit ïa kane ka projek kam shimkhia ban pynbha hynrei ban shu ieh khongreng kumto?
