Shillong, Ïaïong 09
Ki Nongïalam ka Awaken India Movement (AIM) hapoh ka jingïalam jong u Bah Banshai Marba-niang kum Chairman bad ki nongkitkam ha ka jingsynranlang ki paidbah ki la shah khang lynti noh ha ki pulit haba ki la thmu ban tur sha Secretariat na bynta ban leit aiti ïa ka dorkhas sha ka Sorkar Jylla halor ka jingshah pynbor ki paidbah ban shon Aadhaar Card.
Ha kane ka jingleit tur ki Nongïalam bad dkhot ka AIM bad ki paidbah ka dei hadien ba ki Nongïalam ki la dep ai jingkren hakhmat u mot u Kiang Nongbah kaba don hakhmat ka Civil hospital Shillong. La ïoh ban sakhi ba ha kane ka jingthmu leit tur sha Secretariat, ki pulit ki la patan ruh ïa ki katto katne ki dkhot ka AIM bad thmu ban thep hapoh ka kali pulit.
Ka jingpynlong ïa kane ka jingïalang hakhmat u mot Kiang Nangbah ka long shibynta ban pynpaw ïa ka hok longbriew-manbriew kaba kum ki paidbah ki don ka jingshah pynbor ban leh ‘Aadhaar Card’ ha kiba bun ki bynta ha kaba ka la don ruh ka jingshah pynduh ban ïoh ïa u khaw rashon, ka jingshah pynduh ki skhim, ka jingshah pynduhkam bad kiwei-kiwei kiba kum ki paidbah nongshong-shnong ki shah pynduh tang namar ba kim don ïa ka ‘Aadhaar Card’.
Ha kane ka jingïalang pynsngewthuh paidbah bad ban pyrshah ïa ka jingpynbor ban shon Aadhaar la sakhi da ka jingwan ki paidbah na ki shnong bad ki thaiñ bapher bapher ka jylla.
Haba ki nongïalam ka Awaken India Movement kim ïoh ban ïakynduh ïa u Myntri Rangbah ha Secretariat, ki la leit ban ïakynduh noh ïa ka Deputy Commissioner ha shlem treikam jong ka.
Katba ki nongïalam ki dang leit ïakynduh ïa ka DC, ki paidbah ba wan jingïalang kim shym la khih na ka jaka ba pynlong jingïalang hynrei ban shong beit ha ki jaka ba ki don.
Haba wan pyntip sha ki paidbah, u Bah Banshai u la ïathuh hadien ba la ïakren bad ka DC ka la ong ba kam shym don kumta kata ban pynduh ïa ka jingmyntoi ïa ki paidbah haba kim don Aadhaar card.
Shuh shuh u la pyntip ba na ka liang ka DC ka la kular ba kan sa peit bniah hapoh 10 sngi bad ban sa ai jingtip bad ka seng kan sa pyntip ruh ïa ki paidbah lyngba ki lad pathai khubor.
Haba ai jingkren sha ki paidbah, u Bah Banshai u la ong ba ka ïingbishar ka la ong wat pynbor ïa ki paidbah ban leh Aadhaar, hynrei ki don ki nongtrei Anganwadi bad Asha ki la shah beh noh bym don Aadhaar, ki don ki khynnah skul bym ïoh scholarship namar bym don Aadhaar.
