Nongstoiñ, Ïaïong 09
Ki pulit ka West Khasi Hills ha ka 8 tarik Ïaïong, 2025 ki la ïoh ban kem noh ïa 3 ngut ki suba nongkhaïi drok na Nongstoiñ kiba leit shim drok na Assam.
Katkum ka khubor na u Superintendent of Police (SP) ka West Khasi Hills, u la ong ba ki pulit ka Anti Narcotics Task Force (ANTF) haba ki la ïoh jingtip ïa kane, ki la pynap shrip lypa ha Nonglang ha ka por janmiet bad ki la ïoh bat ïa kitei 3 ngut kiba shong ha kawei ka kali kaba don ïa u registration number ML06-A-1450.
U SP u la ïathuh ruh ba kitei 3 ngut kiba la shah kem ki kynthup ïa u Bryan Kharbani, 29 snem ka rta na New Nongstoiñ, u Donkerry Ryntathiang, 25 snem na New Nongstoiñ bad u Morningstar L Rngaid, 31 snem na Pyndengrei Mawkhmahmir.
Shuh shuh u SP u la ong ruh na kitei ki briew la ïoh ban kurup 15 gram u drok heroin bad kiwei kiwei ki tiar kum ki tyndong, ki thyrnia, ki mobile phone bad ka pisa. Kumjuh, ha ka jingkhynra ïa katei ka kali kaba la ñiah da u Kostarlin Iawphniaw (28 snem) na ka shnong Mawlai Syiem, Eastern West Khasi Hills District, la ïoh kurup sa 130 gram u ganja. U la pynpaw ruh ba halor katei ka jingjia, la pynrung mukotduma ha thanat Nongstoiñ katkum ki kyndon ka NDPS bad ka jingtohkit kaba kham bniah ka dang ïaid shakhmat ban buddien ïa ki jingïadei kiba shadien bad shakhmat.
