Shillong, Ïaïong 09
Uwei u briew uba dang 25 snem ka rta, u la shah kem noh ha ki pulit halor ka jingdonkti ban tuh ïa ki jaiñ na kawei ka ïing ha ka shnong Kynshi Mawria ha Eastern West Khasi Hills.
Katkum ka khubor kaba la ïoh na ki pulit la ong ba ka Kong Markalin Sohshang ka la ai ka jingujor ba ha ka 4 tarik mynta u bnai ha ka por kumba 1.30 mynsngi, u runar bym lah ban ithuh u la prong tuh hapoh ka ïing jong ka, kaba don ha Kynshi Mawria (EWKH) bad ban tuh ïa ki jaiñ.
La ong ba kham hadien, ïa kine ki jaiñ kiba la shah tuh, la ïoh ban kurup noh na uwei u briew uba la shah bat ha ka shnong Mawlanghren. Ha kaba ïadei bad kane, na ka liang jong ki pulit ki la kem noh ïa uwei u briew ba la tip kyrteng kum u Staining Nongsiej (25 snem).
Ha kawei ka khubor, ka Kong Pharrilin Kharkyllang ruh ka la ujor ba ha ka 4 tarik mynta u bnai ha ka por kumba 2 baje mynsngi, ka la lap ba la dep ban bujli ïa ka tala bad pyndait da kawei ha ka jingkhang ïing ka jong ka ha ka shnong Mawlanghren (EWKH). La ong ba kham hadien, da ka jingïarap jong ki para marjan, ki la ïoh ban bat noh ïa uwei u briew ha ryngkat bad kawei ka pla kaba dap da ki jaiñ tuh suda.
Ha kiwei pat ki kam tuh kam thiem, u Antonio Nongrum u la ujor ba ha ka 7 tarik mynta u bnai ha ka por kumba 3.30 step phyrngab, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AA-5833 na ka phyllaw jaka sah ka jong u, kaba don ha Mawlai Syllaikariah, Block-II, Shillong.
Kumjuh, ha kawei pat ka khubor, ka Kong Jubilin Nongsiej ka la ujor ba ha ka 3 tarik mynta u bnai ha ka por kumba 10 baje mynstep, ki runar bym lah ban ithuh ki la prong tuh hapoh ka ïing jong ka kaba don ha shnong Tengri, Eastern West Khasi Hills bad ban tuh ïa ki jaiñ bad kawei ka mobile phone kiba shongdor kumba T.45 hajar.
