Mairang, Ïaïong 10
Ka jingïaseng Khasi Jaiñtia Presbyterian (KJP) Assembly kaba XII (Khatar) ka ban sa long ha ka Balang Presbyterian Pyndengumïong, Eastern West Khasi Hills District naduh ka 10 tarik haduh 13 tarik Ïaïong, 2025 bad ha kaba la khmih lynti ba ki riewngeit na kylleng ka ri Khasi bad Jaiñtia kin sa poi ha ka 13 tarik Ïaïong, 2025 na ka bynta ka jingïaseng paidbah ka ban long ha Madan Tiehpdang.
Kumta, ban lait na ka dheng kali bad ban suk ka ïaid ka ïeng, ka ophis u Superintendent of Police (SP) Eastern West Khasi Hills District ka la bthah bad buh ryntih ïa ka rukom pynïaid kali na bynta ki kali kiba wan na Shillong ba kin ïaid lane rung na Lumsohkhlur – Mairang Mission – Pyndengumïong Station bad ki jaka Parking kin long ha Madan Dommawlum ha Tirot Singh Memorial Hall, ha Parking jong Kong Mary Marbaniang, ha Parking jong Kong Madonna Langstieh, ha Parking jong Kong Rosina Marwein, ha Parking jong Kong Mistilda Marwein bad ha Parking jong Bah Kwar Rani.
Shuh shuh ka kyrwoh khubor ka ong ruh ba ïa ki kali kiba wan na Nongstoiñ kin ïaid lane rung na Mawsawa – Pungsaniang bad ki jaka pynïeng kali kin long ha Madan Fire & Emergency Service Training School, ha Parking jong Kong Patricia Mawlieh, Tiehpdang, ha DC, Office Complex bad ha Children Park Parking, Mawsawa. Na bynta ki kali kiba wan na Nongkhlaw kin ïaid lane rung na Langstiehrim – St Thomas School Junction bad ki jaka Parking kin long ha St Thomas Parish Ground, ha Parking jong Kong Madonna Langstieh, ha Parking jong Kong Roitina Nongrum bad ha Madan Football Pyndengumiong, Langstiehrim bad na bynta ki kali kiba wan na Laitdom kin ïaid lane rung na Laitdom – Mairangbah bad ka jaka Parking kan long ha Madan Kuli, Mairangbah.
Ha kaba ïadei bad ki nongñiah kali, la kyrpad ba kin kohnguh ïa ki jingkdew bad jingpynïaid jong ki pulit pynïaid kali bad ki Volunteer, ki nongñiah kali kim dei ban pynher stet, ki nongñiah kali kim dei ban pynïeng kali kulmar harud surok, hynrei ban pynïeng beit ha ki jaka ba la pyni da ki nongpynïaid kali bad ynda la rung ha area Eastern West Khasi Hills District kim dei shuh ban tam shakhmat (pass) ïa kiwei ki kali.
Ka kyrwoh khubor ka ong ruh ba lada don kano-kano ka jingdonkam kyrkieh, sngewbha ban phone sha ka Police Control Room (PCR) Mairang ha u Phone Number – 7629981814.
