Shillong, Ïaïong 10
Ka Sorkar Jylla ka la rai ban buh ïa ka jaka sumar na ka bynta kiba la kyrni ha u drok, ka Addict Treatment Facility (ATF) ha shnong Umsawli kaba hap hapoh Sor Shillong Thymmai, ka ban dei ha ka jaka ba la don lypa jong ka Sorkar, bad ka jingsumar kan long khlem da donkam ban siew.
U Myntri ba khmih ïa ka tnat Social Welfare, Bah Paul Lyngdoh, u la pyntip ba ïa kane ka rai la shim ha ka jingïalang jong ka Drug Reduction Elimination & Action Mission (DREAM) kaba la long ha ka sngi Palei.
Haba kren hadien ka jingïalang, u Bah Paul u la ong ba ki nongdih drok ba la rah na ki surok bad na kylleng ki jaka ka nongbah kim don satia ïa kino-kino ki jaka ban sumar pynkhuid ïa u drok na ka met jong ki lane ka jaka ban ïasyllok.
“Kawei na ki jingeh ba mih ha ka jingïakhun pyrshah ïa u drok ka long ba kiba bun na kiba la kyrni kiba ngi la kem ki donkam ban pynkhuid ïa u drok uba ki la dih na ka met jong ki, bad ban ïasyllok ban pyni lynti ïa ki khnang ba kin lah ban leit phai biang sha ka imlang-sahlang.
Hadien ka jingïalang mynta ka sngi, ngi la sngewthuh ba kine ki jingdonkam ha Civil Hospital ki duna palat, na kata ka daw ngi la rai ba ngin ïaid shakhmat ban buh ïa ka ATF, ka jaka ban sumar ïa kiba la kyrni”, u la ïathuh.
U la ong ba ka sien sdang ïa kane ka ATF kan donkam kumba T.50-60 lak bad ïa kata la mynjur ban ïaid shakhmat. U la pyntip ba ha kane ka jaka sumar kin don ki doktor ‘Psychiatrist’ kiba la dep shah pyntbit ki ban ai jingsumar ban pynkhuid ïa u drok.
“Kin don shwa mynta 5 ngut kiba dang shu pass ïa kiba ngin thung ha katei ka ATF. Nalor kata kiwei pat ki nongïarap la aiti ha ka DREAM hapoh ka jingïalam u Mission Director ba kin pynbeit ïa ki jingdonkam”, u la ong.
Haba kylli, u Myntri u la ong ba yn sdang shwa ban sumar kumba 60 ngut kiba kham donkam bad kyrkieh.
“Ka jingngiam ka long kumba 60 ngut, ngin sdang shwa da kata bad ngin peit shwa ïa ki case kiba kham long kyrkieh. Ki dawai dashin ruh ngin pynbiang kiba la buh ha ka thong ba kin long beit khlem ka jingsiew”, la ong u Bah Paul.
