Shillong, Ïaïong 10
Ka Nongaiktien jong ka Sorkar MDA-II kaba dei ruh ka Myntri Sorkar, Kong Ampareen Lyngdoh ka la ong ba ba ka jingshlei um ha sor Shillong khamtam ha thaiñ Lower Lachaumiere kaba don sawdong u Lum Secretariat, ka la wanrah ka jingsngewkhia ïa ka tnat kaba hap ban saiñdur ïa ka sor Shillong.
Ka la ong ba ka long kaba donkam ban don ki nala kiba biang ban tuid ka um, khnang ban ym sahkut bad shlei sha ki surok.
Ka Kong Ampareen kaba dei ka MLA jong ka East Shillong konstitwensi ha ka sngi Balang ka la leit jurip hapoh ka thaiñ Lachaumiere bad bthah ïa ka tnat Urban Affairs ba kan peit bniah ïa ka jingeh jong ka jingbym biang ki nala kaba lam pat sha ka jingshlei um ha ka por ba jur slap.
“Nga la ïakren ïa kane ka kam bad ki ophisar ka tnat Urban Affairs kiba don lang ha ka jingleit jurip, ngi donkam ban leh kyrkieh ïa kane ka kam. Ngan sa bishar bniah biang ïa kane ka kam hadien 20 sngi,” ka la ong.
Ka Kong Ampareen ka la ong ba ka jingpyndep ïa ka surok All-Saints’ Road kaba don shadien jong ka skul bad ka jingpynïaid ïa ka nala ka long kaba donkam kyrkieh ban pyndep lada jia ba jur slap.
“Mynta ka sngi ngi la ïoh ïa u slap ba nyngkong eh ha shwa ban wan ka aïom slap kaba jur. Ka nala shadien jong ka Sylvan House shi bynta jong ka Secretariat Hills baroh kawei kan shlei um lada jur u slap bad kan kylla long ka jingeh kaba khraw ïa ki longïing ha shi lynter jong kane ka thaiñ. Ngi donkam ban wad ki lad lynti ban ïada ïa ki nongshong shnong”, ka la ong.
Ka Myntri ka la pyntip ba ka um lyngba ka nala kaba don shadien jong ka Sylvan House ka ïaid shilynter na Secretariat Hill sha ka Wah Pomdngiem bad ïa kane ka nala donkam ban pynjylliew bad pynïar ban lait na ka jingshlei um.
Ka la ong ruh ba ka tnat Pynroi Sor ka donkam ban pynthikna ban shim khia mardor ïa kane ka jingeh, namar ka jingshlei um ka lah ban long kaba ma bha ïa ki nongshong shnong kiba sah ha ka bynta jong ka Sylvan House kynthup ïa ka Lachaumiere pdeng.
Ha ka sngi Balang ka Myntri ka la shong bishar bniah ruh ïa ka rukom pynïaid kali hapoh ka thaiñ Lachaumiere.
“Namar ba ka jaka ka dei kaba bun tam ki ophis Sorkar ki nongshong shnong mynta ki shem jingeh bha ban leit jingleit man ka sngi namar ka jingdheng kali ka jur bha hapoh kane ka thaiñ. Nga la ïoh jingtip ba ka tnat Urban Affairs ka don ka Master Plan kaba ki dang pynkhreh bad shen kin sa lah ban pynduna ïa ka jingdheng kali” ka la ong.
Ka la ong ba ka dei kaba shisha ba ka jingangnud ba kongsan tam ka long ban pynkynriah noh ïa baroh ki ophis Sorkar sha New Shillong Township, bad pynpaw ka jingkyrmen ba ka Sorkar kan shim khia ïa kane ka jingeh bad shen yn sa don ki lad ki lynti ban pyllait na ka jingdheng kali.
