Shillong, Ïaïong 10
Ka Khasi Students’ Union (KSU) ha ka sngi Palei ka la ïakynduh ïa u MP ka Shillong Dr Ricky AJ Syngkon bad ha kaba ka la kyrpad ba un tuklar lem halor ka jingdonkam ïa ka North Eastern Indira Gandhi Regional Institute of Health & Medical Sciences (NEIGRIHMS) ba kan shong bishar biang ïa ka roster register bad ka rule thungkam lyngba ka governing council jong ka.
Ha kane ka jingïakynduh, ka KSU ka la aiti ruh ïa ka dorkhas bad ha kaba ka seng ka la pynpaw ïa ki jingleh bor na ka liang u Director jong ka NEIGRIHMS ba thmu ban ïuhroit bad leh shiliang ïa ka hok jong ka jaidbynriew.
Lah ban pynkynmaw ba na ka liang jong ka KSU ka la ïakynduh ïa u Director ka NEIGRIHMS ha 1 tarik u Ïaïong halor bun tylli ki mat jingdawa bad ban pynbeit ïa ki kynrum-kynram, hynrei na ka liang u Director um i shimkhia halor kane ka bynta bad u pynslem khnang ïa ka por ba ka tarik ba khatduh na bynta kane ka kam kan kut noh.
“Ngi kyrpad rit ba phin tuklar lem halor kane ka kam na ka bynta ka jingkiew shaphrang jong kane ka medical institute. Kane ka Institute ka donkam ban shong bishar thymmai ïa la ka roster register bad ki rule thungkam lyngba ka governing council jong ka. Lada ym leh eiei, ka NEIGRIHMS kan sa pynduh ïa ki lad ïohkam bad nang hiar kyrdan ha ki snem ban dang wan,” ong u President ka KSU samla Lambokstarwell Marngar ha ka dorkhas ba la aiti sha u MP.
Haba kdew ïa ka thungkam thungjam ba dang ïaid mynta ha NEIGRIHMS, kaba la pynbna laitkam ha ka 22 tarik Lber, u samla Lambokstarwell u la ong, “Ki kam bapher bapher la pynbna ba ki lait kynthup ka Nursing Officer, Store Keeper bad kiwei ha ka Grade/Group B bad C bad ka Seng ka shem ïa shibun ki jingbym biang kiba lah ban ktah ïa ka jingkiew shaphrang bad ka bha ka miat jong kane ka Institute bad kumjuh ruh ïa ka bha ka miat ki riewlum trai muluk ka Jylla”.
Ka KSU ka la pynpaw ruh ba ka la dep ban ïakynduh ïa u Director ban ai jingmut bad ruh aiti ka dorkhas hynrei kaba sngewsih, ym don kawei ruh ka jingai jingmut kaba la shim bad pyntreikam bad ka jubab ïa kane ka dorkhas la aiti ha ka 4 tarik Ïaïong, 2025, haba pynpaw ba kim dei kiba shong nongrim bad ki bym ïahap, ong u samla Lambokstarwell.
Haba ïadei bad ka rta thungkam, u la ong ba katkum ka jingpynbna laitkam, ka rta ba la buh pud ïa ki nursing officer bad kiwei ki kam la pynduna sha ka 30 snem bad ki Pharmacist sha ka 27 snem. Ha ki snem ba la leit noh ha ka jingthungkam ha NEIGRIHMS, ka rta ba la buh ka ju long 35 snem bad kynsan-kynsan la shu pynhiar sha ka 30 snem, kaba la ktah jur bha ïa ki samla kiba wadkam.
“Namar kata, ka seng ka sngew ba dei ban pynduhnoh ïa ka amendment ha ka Recruitment Rules ba ïadei bad u pud ka rta thungkam bad ban buh beit ïa ka 35 snem kum ka rta ba khatduh ban ïohkam nalor kiwei ki jingpynjynsur ïa ki kam bala buh bhah,” ong u samla Lambok.
Halor ka jingïasam ïa ka bhah thungkam (ratio) ïa ki nos shynrang bad kynthei, une u Nongialam ka KSU u la ong, ka jingthungkam ïa ki nursing officer bala leh ha u snem 2023 lyngba ka NORCET ka dei kaba bakla shibun eh na ka liang ki bor pynïaid ka NEIGRIHMS ha kaba bun ki nos shynrang ki bym lah ïoh jinghikai kila shah thungkam. Wat ki nongpynïaid ka NEIGRIHMS dalade kila ong ba ki nos shynrang ki dei kiba “tam” ki bym shym la shah jied ha kiwei ki Institute bad la shu wan bret ha NEIGRIHMS namar ba ki bor pynïaid kim shym la ïohi ïa ka jingbym don u pud sam kam hapdeng ki shynrang bad ki kynthei kaba long 20:80. Kine ki nos shynrang ki dei bun eh na Rajasthan bad ki bym pat nang ban trei ïa ka kam”.
U la kdew ba ka Institute kum ka AIIMS, JIPMER bad kiwei ki don ïa ka ratio ba 20:80 ha ka jingthungkam ïa ki nos shynrang bad ki kynthei bad kynthoh ‘Lada kiwei ki Institute ki lah ban don ïa ka 20:80 ratio, kaei kaba khang ïa ka NEIGRIHMS ban bud ïa kajuh”. Nalor kane, u samla Lambok u la ong ba ha ka jingpynbna laitkam ba mynta ïa ki nursing officer, kawei na ki kyndon bala pynpaw ïa kito ba pass GNM ka long ba ki kyrtong kiba lah ban aplai ki dei ban don ïa ka jingshemphang ba 2 snem na ki hospital ba 50 jingthiah. Kane ka dei ka sien ba nyngkong ba ka NEIGRIHMS ka la pan ïa ka jingshemphang na ki kyrtong ba aplai kam.
“Ka KSU kam pyrshah ïa ka kyndon ba pan 2 snem ka jingshemphang ïa ka kam hynrei ka kyndon na ka hospital ba 50 jingthiah dei ban weng noh. Ka daw ka long ba kane kan pynsangeh lane pynlong ïa ki nos na Jylla kiba trei ha ki PHC, CHC bad kiwei ki hospital ha Jylla kin duh ban aplai namar kiba bun na kine ki jaka sumar kim don satia ïa ka 50 jingthiah”.
Haba pynpaw ruh ba ka KSU kam kwah satia ïa ka Computer Based Test (CBT) mode, u samla Lambokstarwell u la ong, “Kum kine ki eksam kin long kiba shah liang namar da ka jingduna ki computer centre, kan sa don ka jingphiah ïa ka por ban thoh eksam. Ka jingkylli na kawei ka por thoh eksam ka lah ban suk lane eh ban ïa kawei pat ka por thoh eksam lane lada dei ban ai biang da kijuh ki jingkylli, ka lah ban long ka jingai kabu ïa kiba ïaleh eksam hadien. Kumta ka KSU ka dawa ba ïa ki ‘offline examination’ dei ban pynlong lyngba ka OMR”.
Haba pynpaw ïa ka jingsngewkhia halor ka jingduna ka jingai bhah ïa ki ST, u samla Lambokstarwell u la ong, ka don 27% ka jingai bhah ïa ki OBC bad 15% ïa ki SC ha ka jingthungkam ha ki tnat Sorkar Pdeng. Katkum ka jingong jong u, ha ka Jylla Meghalaya, don ïa ka Schedule Tribe List bad ka Schedule Caste List hynrei kam don satia ka list ki OBC. Ka Meghalaya kam ithuh satia ïa kino-kino ki OBC ha ka Jylla. Katba, ka don tang 7.5% ïa ki SR ha ka Group B. Ha Meghalaya, haduh 90% ki nongshong shnong ki dei ki riewlum bad kane ka jingai bhah ba duna ïa ki ST ka dei ka bym ïahap satia. Kumjuh ruh, ka jingai bhah ba palat ïa kiwei ki riewlum ki bym don ha ka thup ka ST ka Meghalaya ka la nang wanrah ïa ki briew ba nabar sha Jylla.
