Shillong, Ïaïong 10
Hadien ka jingjah jong uwei u nongjngohkai pyrthei na Hungary ïa uba la tip kyrteng kum u Puskas Zsolt, uba la jah rngai naduh ka 29 tarik u Lber, 2025 ha ki thaiñ Sohra, na ka liang ka kynhun ki pulit na Sohra na ka Fire & Emergency Service bad ka State Disaster Response Force (SDRF) ha ka jingïatreilang bad ki nongshong shnong ka Mawkawir bad ka Ramdait bad da kaba pyndonkam da ki kor ring dur ne ki ‘drone’, ha ka nohphai sngi jong ka 10 tarik u Ïaïong, 2025, ha ka por kumba 1:41 minit, ki la lap noh ïa ka metïap jong u Puskas na Ryngku Ksan Elaka Ramdait kumba 5 km na Mawsahew kaba don sha shiliang ka Nongriat.
Haba pynthikna halor kane ka jingïoh ïa ka met jong une u nongwan jngohkai pyrthei, na ka liang U Nongsaiñ Hima u la phone ïa u Superinten-dent of Police (SP) ka East Khasi Hills District, Bah Vivek Syiem, uba la pynthikna halor kane ka jinglap ïa ka metïap u Puskas ha ka 10 tarik u Ïaïong, 2025 hadien ka jingwad ïa u kaba la neh la katto-katne sngi eiei.
Haba kylli halor ka daw jong ka jingkhlad u Puskas, u SP u la ïathuh ba ym pat tip ïa ka daw tynrai halor katei ka jingïap u Puskas bad ïathuh ruh ba katei ka metïap ka la pyut bha namar ka jingjah rngai jong u naduh ka 29 tarik tarik u Lber, 2025.
U SP u la ïathuh ruh ba katkum ka jingïoh jingtip, u Puskas u dei uba don jingshitom ha ka jingpangmat bad lehse, u la syntuid bad ur na katei ka riat bad u khlem ïoh satia ïa ka jingïarap namar katei ka jaka ka long kaba kynjah bad bym don briew.
“Ngim pat tip ïa ka daw hynrei ngin sa tip ynda la dep ban leh ïa ka Post-mortem bad ka met ruh ka la pyut hynrei katkum ka jingïoh jingtip jong ngi, utei u briew u dei u ba don ka jingshitom pang mat kaba lehse, u la ur namarba katei ka jaka ka dei ka bym don briew bad kaba kynjah”, ong u SP.
U SP u la ïathuh ïa ka met ba dang sah u Puskas yn sa leh ïa ka Post-mortem ha ka sngi kaba bud kata ha ka 11 tarik u Ïaïong, 2025, bad halor kane ka jinglap ïa ka metïap u Puskas la dep ban pyntip sha ka Embassy jong ka Hungary.
U SP u la ïathuh ba u Puskas u la poi ha kawei ka Hotel kaba don ha Laitumkhrah ha ka por kumba 3:45 baje mynstep jong ka 29 tarik u Lber, 2025 bad u la mih na katei ka Hotel ha ka por 9 baje mynstep da kawei ka taksi kamai kaba la leit ban buh ïa u ha Mawsahew ha ka por mynsngi bad u la mih marwei da ka jingthmu ban leit ïaid kjat na Mawsahew sha Nongriat da kaba kit tang kawei ka pla kieng.
Shuh-shuh, u SP u la ïathuh ba na ka liang ki bahaïing- jong u Puskas haba kim ïoh ban kren phone ïa u, ki la pyntip noh ïa kane ka jingjah u Puskas sha ka Embassy jong ka Hungary kaba la pyntip sha ki pulit ka Jylla ha ka 2 tarik u Ïaïong, 2025 bad na ka liang ki pulit ka Jylla, ki la pynlong ïa ka jingwad ïa utei u nongwan jngohkai pyrthei ha kylleng kitei ki jaka naduh katei ka sngi.
Halor kane ka jingjah jong une u nongwan jngohkai pyrthei, na ka liang ka Hungarian Embassy ka la mudui da ka ejahar halor kane ka jingjah u Zsolt ha ka 2 tarik u Ïaïong, 2025.
