Shillong, Ïaïong 10:
U Myntri ka tnat Pule-Puthi ka Jylla, Rakkam A Sangma u la ong ba lada ki don ki bym kwah ban pyndonkam ïa ka kot ïarap ‘CM Impact Guidebook’ ki lah ban bret lane thang noh ïa ka, namar kam dei kaba kongsan, hynrei na ka bynta kito kiba kwah ban pyndonkam bad sngew ba ka don ka jingïohnong ki lah ban pyndonkam.
Kane ka jingkren u Rakkam ka long haba kylli halor ka jingdawa jong ka Voice of the People Party (VPP) ba dei ban pynduh pyndam noh ïa ka kot ïarap ba la pyllait da u Myntri Rangbah.
“Nga ruh nga ïahap ïa kaei ba kren ka VPP. Lada don ki bym kwah ban pyndonkam ïa ka kot ïarap ki lah ban bret noh namar kam dei kaba kongsan. Phi lah ban thang ïa ka, phi lah ban leit bret noh sha pung Umïam ne shano-shano, hynrei kito kiba sngew myntoi ki lah ban pyndonkam”, la ong u Myntri haba kren bad ki lad pathai khubor ha ka sngi Palei.
U la ong ba ka Sorkar ka la pynlong ïa ka eksamin matrik (SSLC) da ka kot ïarap, kam mut ban shu pynpass jubor ïa ki khynnah, hynrei ka kot ïarap ka shu ai jingmut ïa ki khynnah kumno ban pynkhreh ïa ka eksamin.
Ha kawei ka liang u Myntri u la pyntip ba ka Sorkar ka la rai ban pynsangeh shwa ïa ka jingpynrung klas ha ki jaka pule ban wanrah ïa ka rukom treikam kaba la buh ryntih, ban pynthikna ba ka jingpynrung klas ka dei ban long ïa baroh ki samla pule kiba pass ïa ka eksam SSLC.
“Ngi la pynsangeh ïa ka jingpynrung klas ha kiba bun ki jaka pule hadien ba ngi ïoh jingkheiñ kaba haduh katno ngi lah ban pynrung klas ïa ki samla pule ha ki district, East Khasi Hills, Ri-Bhoi, Jowai. Ngi dang pynkhreh ïa ka rukom treikam kaba la buh ryntih”, la ong u Rakkam.
U la ong ba ka Sorkar ka dang pynkhreh ruh ban kyntiew kyrdan ïa ki skul Secondary sha ki skul Higher Secondary ha baroh kawei ka Jylla, hadien ka jingkiew kynsan ka jingpass jong ki samla pule ha ka eksam SSLC kaba kot haduh 87.10%.
Haba kylli, u Rakkam u la ong ba ka Sorkar kam ïohi satia ïa kano-kano ka jingeh ban pynrung klas ïa ki samla pule ha Shillong namar ka percentage kiba pass ka long kumba ju long man la u snem kaba 70% haduh 80%, hynrei ka jingeh kan jur eh ha ki district sha nongkyndong.
“Ngi la pynshlur ïa ki jaka pule ba ïoh jingïarap ba kin pynrung klas bun ngut bad ban sdang ruh ïa ka jingshim klas mynstep (morning section) ha ki katto-katne ki jaka pule Sorkar”, u la ong.
U la ong ba kin don sa kumba 20,000 tam ki samla pule mynta u snem, bad ka Sorkar ka kwah ban don ïa ka rukom treikam ba la buh ryntih bad ka dang pynkhreh ïa ki jingdonkam baroh namar kam kwah ban ïohi ïa ki samla ba kin duh rung klas.
