Shillong, Ïaïong 10
Ka Prof Sherwin M Sungoh ka la ai ïa ka shithi iehnoh kam na ka shuki Pro-Vice Chancellor bad ha ka jaka jong kata, ka la tyrwa ban treikam noh kum ka Vice Chancellor (In-charge) jong ka skulbah North Eastern Hill University (NEHU).
Ha ka shithi ba la phah sha ki bor khmih sha Delhi, ka Prof Sungoh ka la ong ba haba khmih ïa ka jinglong jingman hapoh ka skulbah bad ka jingdawa jong ki kynhun bapher bapher, ka long kaba eh ïa ka ban treikam kum ka Pro-Vice Chancellor hapdeng ki jingpynbor kiba jur.
“Halor kine ki nongrim ba la kdew, nga jied ban buh ïa ka shithi iehnoh kam na ka shuki Pro Vice Chancellor bad ngan treikam noh kum ka Vice Chancellor (In-Charge) katkum ka hok ba nga dei ka professor ba la rangbah duh, katkum ka status 2(A)(5)(i) jong ka skulbah, ha ryngkat ka bor ban pynïaid ïa ki kam ki jam bad ban pynïaid ïa ka pisa pilaiñ, ka ban long noh mardor,” kala thoh.
Ka Prof Sungoh ka la kdew ruh ïa ki jingeh ba la ïakynduh naduh ba u Prof Prabha Shankar Shukla u khlem lah wan trei hapoh ka headquarter bad ka bor ba la ai sha ka ban pynïaid ïa ki kam bad ka pisa tyngka ka dang duna palat ban lah pynïaid ïa ki kam ki jam ba man ka sngi jong ka skulbah.
Ka ong ba ki jingïalang jong ki School Board jong ka skulbah ki la dep kut bad mynta ïa ki jingai jingmut dang ap ban ïoh ïa ka jingmynjur jong ka Academic Council| Executive Council kaba ngam don satia ha ka bor ban pynïaid.
“Ka jingpynrung klas ïa ki samla pule thymmai kan sa sdang naduh ka aiom sdang klas ban wan, kumta, kan bha shibun ban wad ïa ka lynti ban pynbeit ïa kane ka jingeh ba don mynta ha shuwa ba kan dier ka por,” ka la ong haba pyntip ba ka skulbah ka la ïakynduh ruh ïa ki mukotduma ba dang sahteng ha ki ïingkashari, ka jingpynïasoh bad kiwei kiwei ki kam ba ïadei bad ka pule ka dangle.
