Shillong, Ïaïong 10
Ka tnat Jngohkai jong ka Jylla kan sa shimti biang noh ban peit bad pynïaid ïa ka Nan Polok ‘Ward’s Lake’ na ka tnat Khlaw, ha kaba yn sa pynlut haduh T.18 klur na ka bynta ban buh ïa ki jaka pynbyrngia ïa ki nongwan kai, bad la rai ruh ban plie haduh 10 baje mynmiet ïa katei ka jaka jngohkai ba pawnam ha sor Shillong.
Haba pyntip ïa kane ha ka sngi Palei, u Myntri ba khmih ïa ka kam Jngohkai, Bah Paul Lyngdoh u la ong ba mynshwa ïa ka Nan Polok la khmih da ka tnat Jngohkai, hynrei namar katto-katne ki daw la shim ban pynïaid noh da ka tnat Khlaw bad Pynneh Mariang, hynrei ha ka jingïalang ba dang shen ba la khot da u Myntri Rangbah la mynjur ban pynphai biang noh sha ka tnat Jngohkai namar ka dei ka jaka jngohkai.
“Ka Nan Polok ka dei kaba khring bha ïa ki nongjngohkai pyrthei sha kane ka Jylla, bad ka jingkieng Nan Polok ka long kum ka shap jong ka Jylla”, u la ong.
Haba pyntip ba ïa ka Nan Polok yn plie noh haduh ka por 10 baje mynmiet, u Bah Paul u la ong, “Baroh shikatta ïa ka Nan Polok la pynïaid da ka tnat Khlaw, bad lait noh ha ka por ba don tamasa, ha ka por 5 baje janmiet la khang noh. Ka por 5 baje ka long kloi palat, namar ka dei ka por ba ki ophis ki dang wai trei, kaba mut ba wat ki nongtrei Sorkar ruh tang ban rung kim ïoh. Ngi mut ban pynjlan noh ïa ka por ban plie haduh 10 baje mynmiet”.
U Myntri u la pyntip ruh ba ka tnat ka la mynjur ban mang pisa haduh T.18 klur na ka bynta ban shna ïa ki jaka pynbyrngia, naduh ka jaka ba rung bad ban pynïar shuh-shuh ïa ki lynti rung bad kumjuh ban tei ïa kiwei ki jingdonkam ba pynthaba bad jingtem.
“Kan dei hi ka jingkyntiew ïa ka kam jngohkai ha kane ka Jylla jong ngi”, la ong u Myntri.
Haba kylli ha kaba ïadei bad ka jingkhim ka surok kaba ïaid pyllun ïa ka Nan Polok, u Bah Paul u la ong ba ka tnat tang shu shimti biang ïa katei ka jaka, kan khot ïa ka tnat Pynroi Sor, ka tnat PWD (Roads) ban pynbit pynbiang na ka bynta ban pynheh ïa ka surok.
