Shillong, Ïaïong 11
Ka Sorkar Jylla ka la wad jingtip halor ka jingïap ba syndet jong uwei u pulit Home Guard uba dang leit pyntbit ha ka jaka ai jinghikai ka NDRF kaba don ha Guwahati, Assam. Katkum ka jingpyntip sha ka Sorkar Meghalaya la ïathuh ba utei u pulit Home Guard uba la tip kyrteng da u Bah Ribokson Dkhar Sawian (34), la suba ba u la khlad namar ka jingsangeh tied kynsan u klongsnam (Heart Attack) ha ka janmiet jong ka 9 tarik Ïaïong.
Katkum ka khubor ba la ïoh la ïathuh ba ha ka 9 tarik ki pulit ka Changsari ki la lap ïa ka met jong u Bah Ribokson na Amingoan, North Assam ha ka por kumba 9 baje eiei janmiet.
La ïathuh ba ha ka por mynstep jong ka 10 tarik ki paralok ba leit pyntbit lang bad u Bah Ribokson ki la leit ban wad ïa u ha ki jaka ba marjan, hynrei hadien ba kim lap dien eiei ki la leit ban ujor noh da ka ejahar ha thanat Changsari, bad haba pyni ïa ka dur, ki la ïoh jingtip na ki pulit ba la ïoh tam ïa ka met jong u Bah Ribokson ha ka miet 9 tarik.
Haba kylli halor kane ka jingjia, u Symbud Myntri Rangbah ka Jylla ba khmih ïa ka tnat Pohïing, Bah Prestone Tynsong u la ong ba katkum ka jingpyntip ki pulit, u Bah Ribokson u la mih kai na ka jaka sah ha ka por janmiet jong ka 9 tarik, bad lehse ka lap kynsan ka jingshitom sangeh tied u klongsnam kaba la pynlong ïa u ban khlad syndet ha ka jaka ba u kyllon.
U la pyntip ruh ba ïa ka post mortem la dep ban leh ha ka sngi Thohdieng ban pynthikna ïa ka daw kaba pynlong ïa u Bah Ribokson ba un khlad.
“Ngim lah ïa mynta ban ong ba ka dei ka jingshah pynïap, namar katkum ka jingtip ba ngi ïoh haduh mynta ka sngi ka dei beit na ka jingshitom kynsan. Wat la katta, ha kine ki khyndiat sngi ban wan ngin sa lah ban pynshisha ïa ka daw baroh hadien ba la ïoh ïa ka kaiphot post mortem kaba la leh ha Guwahati”, la ong u Bah Prestone.
