Shillong, Ïaïong 11
Ki ar tylli kynhun ka North Eastern Hill University (NEHU) ba kynthup ïa ka NEHUTA bad NEHUNSA ha ka Sngi Thohdieng ki la pynpaw ka jingsngewkmen halor ka jingshimti jong ka Prof. Sherwin M. Sungoh kum ka ‘Acting Vice-Chancellor’ bad kular ban ai ka jingïatreilang ban pynurlong ïa ki jingdawa ba sahteng kumjuh ban pynbeit ïa kiba bun ki kynrum-kynram hapoh ka skulbah.
“Hooid, ïa kane ka ‘General Assembly’ ngi la pynkhreh naduh mynshisngi namar ngi la ïohi ïa ka shithi ba i Prof. Sungoh i la ieh noh ïa ka kam kum i Pro Vice-Chancellor, hynrei i la pynïasoh pat kum ka ‘Acting’ VC katkum ka ‘Statutes’ 2A 5(i) namar i la dei i nonghikai iba rangbah tam bad ka la dei ka pali jong i,” ong u President ka NEHUTA, Prof. Lakhon Kma haba kren sha ki lad pathai khubor hadien ka jingïalang hakhmat ophis treikam u VC.
Haba kdew ba kane ka dei ka jingdawa jong ki naduh kaba sdang, kata ban shimti kum ka VC ba pura, u la ong, “Phi ïohi kum ka Pro-VC phin hap ïaid da ka jingbatai jong u VC uba shong sha jngai. Kum ka Pro-VC, phim lah ban leh ïa ki kam laitluid bad phin hap sngap beit ïa ka jingbthah na u VC. Hynrei, kum ka ‘Acting’ VC, phi don ka bor ba pura bad ha ngi mano-mano ba shong ha ka shuki, lada dei makna ka ‘Acting’ VC ruh, dei hi ka VC.”
Haba pynsngew ba ka Prof. Sungoh kan ïoh lut ka bor kumba long u Prof. P.S. Shukla (VC), u Prof. Kma u la ong ba kum ka NEHUTA bad NEHUNSA ki ai ka kti ka mon, kti ka diang ba kan leh bha haba ka shong ha katei ka shuki bad ban pyndep ïa ki kamram ba la bynshet ha ka.
“Hooid i don por tang khyndiat kumba phi tip namar in shongthait noh ha ka 31 tarik Jymmang, lait noh lada don eiei lehse kaba lah ban wan na ka tnad pule-puthi ka Sorkar Pdeng, ïa kata ngim tip,” u la ong.
Ha kajuh ka por, u la pynpaw ka jingkyrmen ba lyngba ka jingïatreilang hapdeng ka NEHUNSA, NEHUTA, bad NEHUSU, yn sa lah ban pynurlong ïa kiba bun ki jingdawa bad pynbeit ruh ïa kiba bun ki kynrum-kynram.
“Ka jingïakynad bad jingbitar jong ngi ha kato ka por – namar haba phi long Pro-VC, phi shah shalai beit ha u VC uba don sha jngai. Hynrei mynta phi la laitluid bad phi la ïoh leh katba mon, katkum ki kyndon ka ‘NEHU Act’ bad ‘Statutes’, katkum ki kyndon ka Sorkar India, bad kiwei bad phi lah ban leh kano-kano ka kam khlem da donkam ka jingbit na u Shukla,” u la ong da kaba bynrap ba ka seng kan ai ka jingkyrshan kaba pura ïa ka ‘Acting’ VC. U la ong ruh ba ka jingïalum ha kane ka sngi ka long ban ai khublei ïa ka Prof. Sungoh bad ki dkhot ka seng kiba la ai ka jingkyrshan ïa ka NEHUTA bad NEHUNSA bad kiba la ïatreilang ha kine ki bnai ba la dep haduh ban da poi kane ka khyllipmat ba la ïoh ïa ka ‘Acting’ VC.
Shuh shuh u President ka NEHUTA u la bynrap, “Ngim donkam shuh ïa u Shukla hangne, ïa ka skulbah yn pynïaid beit ka ‘Acting’ VC katba shah ka por. Ynda la dei ka por ban leit, ngin sa pyrkhat da kumwei namar ka aiñ ka shah ïa ngi ban buh pat da uwei pat u ‘Acting’ VC – uba rangbah tam…kino-kino kiba treh ban shim ïa kane ka kam.”
