Shillong, Ïaïong 11
Ki samla pule Pharmacist kiba la pyndep ïa ka jingpule ha ka liang ka ‘Pharmacy’ ki la pynpaw ïa ka jingsngewsih halor ka jngïai sngap mynthi bad ka jingleh bym suitñiew ka Sorkar Jylla haba ïadei bad ka lad ïohkam-ïohjam kitei samla pule.
Haba kren sha ki lad pathai khubor ha Shillong Press Club, na ka liang u samla Emos John Syiemlieh u la pyntip ba ha ki snem ba la dep, kitei ki samla ki la leit ban ïakynduh ïa ka Myntri tnat ka koit ka khiah ka Sorkar Jylla, Dr. Mazel Ampareen Lyngdoh ban pynsngew ïa ki jingeh kaba kum ki samla kiba la pyndep ïa ka jingpule Pharmacy ki ïakynduh hynrei tad haduh kine ki sngi ba mynta ruh na ka liang jong ka Sorkar Jylla ka khlem pynsngap bad ka khlem shym la leh eiei satia.
Kitei samla ki la kyrpad ïa ka Sorkar bad kumjuh ïa ka Myntri ban shimkhia ïa kaei kaba ki samla pule Pharmacy ki la dep ban pynsngew haba ïadei bad ka jingthungkam Pharmacy ha manla ki PHC, CHC bad ha ki jaka sumar bapher-bapher bad ki District ruh kumjuh bad ban thung shuh-shuh ïa ki Drug Inspector ha ka manla ki distrik.
“Ki kam Pharmacist kiba bun ki khlem pynmih jingpynbna kat haduh kine ki sngi ba mynta. Ki lah bun ki PHC, CHC bad ki jaka sumar hynrei kim don ïa ki Pharmacist”, ong u samla Emos.
U la ong ba katkum ki kyndon treikam jong ka Indian Public Health Standards (IPHS), ka Sorkar ka khlem pyntreikam ne pynbiang ban kyntiew ïa ki lad aikam da kaba seng ïa ki karkhana shna dawai bad ban pynbun shuh-shuh ïa ka bor briew jong ki nongai dawai ha baroh ki jaka kum ha ki District Hospital, ki CHC, ki PHC bad ki Sub-Centre.
Shuh-shuh, u samla Emos u la pynsngew sha ka Myntri da kaba ong ba wat la ki dei tang ki khynnah hynrei ka lawei jong ka Ri, ka shong ha ki khynnah samla da kaba bynrap ruh ba ym dei ban pynbor ïa ki ban shim pat da kiwei ki sienjam ban leit sha ïingkashari ne ban pynlong da ka jingïakhih.
“Wat pynbor ïa ngi ban shim da kiwei pat ki sienjam la ka long ban leit sha ïingkashari lane ngin pynlong da ka jingïakhih. Ki paidbah kiba la jied ïa i ban long kum nongthaw Aiñ hynrei wat ai pat ba kata ka Aiñ kan treikam kylla ïa phi”, ong u samla Emos.
Namarkata, u la kyrpad ïa ka Myntri ba ïa kaei ba ka la kular hakhmat kitei ki samla ka dei ban pyndep ïa kata khnang ba kum ki samla kin don ïa ka jingsngewhun.
Shuh-shuh, u samla Emos u la pyntip ruh ba lyngba ka RTI la lap ba ka Meghalaya Pharmacy Council naduh u snem 1996 tad haduh kine ki sngi kiba mynta, kam pat shym la don ka jingpynthymmai ïa ki nongkitkam. Kumta ki la dawa na ka Sorkar lyngba ka Tnat Pharmacist ban sei madan ïa ki nongkitkam ka Meghalaya Pharmacy Council namar ka dei kane ka Council kaba la pynïaid lut ïa ki kam ki jam baroh naduh ka jingpynïaid ïew ne ki jingpynrung kyrteng bad kiwei-kiwei ki kam la pynïaid da kane ka Council.
“Ïa kine kiei-kiei baroh ka dei beit ka jingbym shimkhia bad ka jingleh meinah ïa ngi ki samla ba pule Pharmacy, hynrei wat shim ïa kane ka kam tang ban ïalehkai namar kane ka dei ka kam kaba kongsan kaba u paid ka bri u hynñiewtrep bad ki paidbah kiba don hapoh ka Jylla ki pyndonkam ïa ki dawai”, bynrap u samla Emos.
