Nongpoh, Jymmang 08
U Myntri ba dei khmih ïa ka tnad Community and Rural Development ka Jylla, u Bah Sosthenes Sohtun ha ka Sngi Thohdieng u la leit ban plie paidbah ïa ka ‘Ñiangtaser Festival’ kaba 2 sngi lynter kaba la pynlong da ka Ri-Bhoi Tourism and Environ-mental Development Forum (RBTEDF) ryngkat ka jingsnohktilang ka Shnong Saiden.
Ïa kane ka tamasa la pynlong ha Ïewsier, Ri-Bhoi District.
Ha kane ka sngi la wan ruh ban ïadon ryngkat da u Dr. Celestine Lyngdoh, MLA ka Umsning konstitwensi, u nonghikai ba la shongthait ka skulbah NEHU, u Prof. H.J. Syiemlieh, u nonghikai ka skulbah USTM Dr Rodeson Thangkhiew, u President ka RBTEDF Bah Plielad Tiewsoh, u Rangbah Shnong ka Saiden, Bah Evansis Jones Myrthong nalor kiwei kiwei de.
Kum ban shu ïathuh hangne khyndiat, ka Ñiangtaser kaba la ju tip ruh kum kata ka ‘ñiang World Cup namar ka jingmih ka jong ka tang shisien ha ka saw snem, kata tang haka por miet bad thik tang ha u snem ba ju pynlong ïaka FIFA World Cup. Kadei ruh ka jait khñiang kaba shngiam ban bam bad kaba don ruh haka ïa shibun ki jingmyntoi naka bynta ka met jong u briew katkum ka jinglap ki stad wad bniah.
Ha kane ka sngi, hapdeng jong ka prokram, kala don ruh ka jingther jong u ‘lapbah, kaba la pynthud ïaka rukom leit rukom wan jong ki paidbah bad ki nongshong dukan ha katei ka jaka, hynrei wat hapdeng katei ka jingpynthud jong u ‘lapbah, ka prokram kala iaid beit iaid ryntih kumba la buh bad ïa kane ka tamasa yn pynkut lashai ka sngi, ka 9 tarik u Jymmang 2026.
Haba ai jingkren ha kane ka sngi, na ka liang u Dr Celestine Lyngdoh ula pynpaw ïaka jingsngewkmen ban ïadon bynta ha kane ka tamasa bad ai jingmut ba lehse ha ka snem 2030 ba kane ka jait khniang kan mih biang, ngin ïaleh ruh ban nym kem ïaka bad ailad ïa katei ka jait khñiang ba khampher na kiwei pat ki jait khñiang ba kan pyndep ïaka jingim ka jong ka.
Naka liang u kongsan ha kane ka sngi, u Bah Sosthenes Sohtun, u la pynpaw ba kane ka tamasa kadei kaba khampher naba la ju pynlong tang shisien ha ka saw snem. U Bah Sohtun u la kyntu ruh ïaki paidbah ba kidei ban pynneh pynsah ïaki khlaw ki btap bad ka mariang, naba kane ka jait khñiang ka kham mih bha ha ki jaka ba bun ki dieng ki siej bad ki khlaw ki btap.
Haba batai bniah shaphang kane ka Niangtaser, u Prof. HJ Syiemlieh bad u Dr Rodeson Thangkhiew kila ïathuh ba kane ka khñiang kaba dei na ka kur jongka ‘Ñiang Kongwing, kadei kaba khampher bad kaba phylla namar ka mih tang shisien haka saw snem bad pyntip ki pylleng kane ka khñiang ki tyllun hapoh khyndew kumba lai snem saw snem na kawei ka kyrdan sha kawei pat haduh ba kan da kylla khñiang bad ka im tang kumba shi bnai hapoh sla pyrthei bad jah biang.
Kitei ki stad wad bniah kila ïathuh ruh ba kane ka khñiang kadei kaba don shibun ki jingmyntoi naka bynta ka met ka jong u briew bad pyntip ruh katkum ka jingwadbniah ka jong ka, kum ka iron, ka calcium, ka magnesium, ka amino acid bad kiwei kiwei de ki jingmyntoi kiba tei ïaka met jong u briew.
