Shillong, Jymmang 08
U National Vice-President ka NPP uba dei ruh u Symbud Myntri Rangbah ka Jylla, Bah Sniawbhalang Dhar ha ka Sngi Thohdieng u la noh ïa ka jingkyrshan ba pura sha u Dr. D.R.L. Nonglait na ka bynta ka ilekshon shiteng samoi jong ka Shillong Lok Sabha, da kaba ong ba ka seng ka angnud ban pyntikna ïa ka jingjop jong u bad ba u kyrtong um don ïa kano-kano ka jingpyrshah shimet kaba long pyrshah ïa u.
“Hynnin ka sngi ngi la pynbna paidbah ïa u kyrtong jong ngi u ban ïakhun ha kane ka ilekshon shiteng samoi ban wan sha ka Shillong Lok Sabha bad tang, ba ngin trei shitom ban pynjop ïa u,” la ong u Bah Dhar haba kren sha ki nongthoh khubor.
Haba jubab halor ka jingpyrshah jong ki paidbah ïa ka Sorkar, u Bah Dhar u la ong ba ka seng ka la pynleit jingmut ha ka kam kaba don hakhmat eh.
“Ngam tip la ka don ne em. To ngin ïa peit, namar ngi hap ban trei shitom ban pynjop ïa u. Kata ka dei ka jingkular na ka liang ka seng,” u la ong.
U la batai ïa u Dr. Nonglait kum uta u bym don kano-kano ka dak ne jingthohbria haba phai sha ki kam saiñ pyrthei.
“Nalor kata, hooid, phi la ïohsngew ïa ka jingkren jong u. U long uba shida bha. U la pynpaw ïa ka daw balei ba u rung sha ka saiñ pyrthei. Naba u dei u ‘riew thymmai bad u kyrtong thymmai, nga sngew ba ka jingpyrshah shimet kaba long pyrshah ïa u ka lah ban long ‘Zero’,” la ong u Bah Dhar.
“Lada don kino-kino ki jingduna hangne-hangtai na ka seng, nga tharai ngin sa lah ban pynbeit ïa kita,” u la ong.
Halor ka jinglah ban don kiba kynriah sha ka NPP, u Bah Dhar u la ong ba ka dang kloi eh ban ong eiei haba ïadei bad kane.
“Lehse don napdeng kiwei pat ki nongïalam saiñ pyrthei ki la pynïasoh sha ngi namarba ki la ïohi ïa ki kam ba bha jong ka Sorkar. Lehse ynda la wan ka ilekshon, ngan sa lah…lehse hooid, phi dei halor kata, naba don ki katto-katne kiba la pynpaw ban pynïasoh bad hangta yn sa ai ïa ka rai,” u la ong.
U Bah Dhar u la ong ba ka NPP ka thmu ban ïoh ïa ka jingbun paid ha ka ilekshon ban wan sha ka Ïingdorbar Thawaiñ ka Jylla.
“Ha u snem 2028, nga tharai ba ngin sa lah ban jop ha ryngkat ka jingbun paid kaba skhem. Balei nga ong kumta ka long namarba bun ki kam ki la urlong ha Madan kumba nga kren,” u la ong.
“Ka paw shai ba ka jingïakhun ka don hynrei ngi hap ban ïaleh kumno ban ïoh ïa ki nombar,” u la ong.
Haba kylli shaphang ka VPP bad kiwei-kiwei ki seng ka Liang Pyrshah, u Bah Dhar u la ong ba ka NPP ka pdiang sngewbha ïa kane ka jingïakhun.
“Kam don jingeh. Ka VPP ka don, ka Congress ka don, ka UDP ka don, ka NPP ka don, bad ki briew ki la sakhi ba bun ki kam ki urlong ha kine ki 8 snem ba la dep”, u la ong.
“Ki paidbah ka Jylla, ki tip shano ban thep ‘vote’, ïano ban thep ‘vote’,” u la ong.
