Shillong Jymmang 08
Ka Sorkar Meghalaya ka la thaw ïa ka ‘Commission of Inquiry’ hapoh jong u Justice (Retd) T. Vaiphei ban tohkit halor ka jingïakynad bad ka jingkulmar kaba la jia ha Ri-lum Garo ha ka por ba thep kyrteng na ka bynta ka ilekshon sha ka Garo Hills Autonomous Dis-trict Council (GHADC) ha ka 9 tarik Lber, 2026.
Ka jingpynbna, kaba la pynmih da u Chief Secretary, u Dr. Shakil Ahammed, ka ong ba katei ka rai ka long hadien jong ki khubor ba la ïoh lum ha kaba ïadei bad ka jingïakynad bad ka jingkulmar ha Ri-lum Garo bad ki mat kiba kham khraw kiba mih na ka jingshah thombor bad jingkulmar ha ka imlang-sahlang bad hadien kata, ka jingduh noh ïa ki mynsiem briew bad ki jingdon-jingem.
Da kaba pyndonkam ïa ka kyndon 3 jong ka ‘Commission of Inquiry Act’, 1952, u Lat u la bynshet kam ïa ka kynhun ban tohkit halor ki jinglong-jingman kiba la ïalam sha ka jingjia ha ka 9 tarik u Lber ha West Garo Hills bad ban aiti ïa ka kaiphod wad bniah kaba kyllum halor ki kam ne jingbym leh jong ki briew bad ki bor ba dei khmih, “kynthup ïa ka jingbym lah ban khanglad ïa kane ka jingjia ban wan jia.”
Ka Commission kan khmih bniah ruh ïa ki daw tynrai jong ka jingïakynad, ban ai jingmut ïa ki lad ki lynti ban pynbeit bad ki jingpynkylla ha ka jingpynïaid kam ban ïada na ka jingjia biang, bad kan ai jingmut ïa ki sienjam kiba biang, kynthup ïa ka jingïarap pisa, na ka bynta kito kiba la duh noh ïa ki jingdon-jingem ne ki jingim namar ki jingkulmar.
La ai por hynriew bnai ïa kane ka kynhun naduh ka tarik ba la pynbna ban aiti ïa ki jinglap bad ki jingai jingmut sha ka Sorkar Jylla.
Ka jingbishar kan long ha Tura lait noh lada ka Commission ka rai da kumwei pat.
Ka jingpynbna ka bynrap ba ka Commission kan thaw la ka jong ka rukom treikam bad ka lah ruh ban pan jingïarap na ki ophisar, ki ‘riewshemphang, lane kiwei-kiwei ki kynhun katkum ka jingdonkam.
Ki kyndon jong ka ‘Commission of Inquiry Act’ kiba ai bor ïa ka ‘Civil Court’ la pyntreikam lang ha kane ka jingtohkit.
Ïa ka jinglut-jingsep na ka bynta ka Commission yn bei da u Commissioner ka Division, Garo Hills, katkum kane ka hukum.
