Shillong, Jymmang 08
U Symbud Myntri Rangbah ka Jylla, u Bah Sniawbhalang Dhar uba khmih ïa ka tnad Urban Affairs ha ka sngi Thohdieng u la ïathuh ba ka Sorkar ka dang trei ïa ki kam halor ka jingpynkynriah noh ïa ki nongdie madan na Laitumkhrah, kaba la ïatreilang bad u Rangbah Shnong bad la dep ruh ban ithuh ïa ki jaka ban pynkynriah.
“Ngi la trei ïa ka kam, wat ha u bnai ba la lah ruh, nga la ïashong jingïalang bad baroh ki Nongïalam Shnong ka Laitumkhrah bad ki la kmen bha ban khot ïa ka jingïalang, hynrei ngin dangtrei ban leh ïa ki kam ba thmu ban leh,” u la ong.
U la ong ruh ba ka jingslem baroh, kadei namar ka jingmih ki jingeh bad ki Dorbar Shnong.
“Balei ba ka la slem khyndiat, namar ki don katto katne ki jingeh ba ïatyngkhuh bad ki Dorbar Shnong bad mynta ngi la lah ban ïarai lang bad mynjur. Ngi la dep ruh ban ithuh ïa katto katne ki jaka bad ngin sa pynkynriah ïa ki ha ka por kaba biang,” u la ong.
Halor ka jingtyrwa shna jaka ïaid kjat ki paidbah ha Khyndailad, u Bah Sniawbhalang u la ong ba ka jingpynkhreh ïa ka ‘detailed project report’ ka dang ïaid mynta.
Haba kynthoh halor ki khubor ba julor biang ka tnum jong ka Ïingdorbar ba thymmai ha New Shillong, u la ong “Wat khuslai, yn sa leh paka bha ïa kiei-kiei baroh. Mynta ka dang don hapdeng ka jingtei. Kumno kan don ka jingjulor haba ïa ka kam, ym pat lah pyndep. Ngin ap haduh ban da dep pura ïa ka”.
Halor ka jinglong jingman ka Inter-State Bus Terminal, u Bah Sniawbhalang u la ong, ba la dep ai ïa ki jingbthah sha ka Meghalaya Transport Corporation ba kin pynkhuid.
