Shillong, Jymmang 08
Ka Khun Hynñiewtrep National Awakening Movement (KHNAM) ka la pynpaw ba kam sngewhun satia ïa ka kaiphod jong ka ‘Expert Committee’ halor ka Reservation Policy, da kaba kdew ba katei ka ‘Committee’ ka dei kaba la thaw hi da ka Sorkar.
Haba kren sha ki nongthoh khubor u Bah Thomas Passah Working President ka KHNAM, u la ong ba ka party ka la leit ban shim bynta ha ka jingïalang ba la khot da ka Sorkar halor ka ‘State Reservation Policy’ ban ïakren ïa ka kaiphod jong ka ‘Expert Committee’ bad hadien ba la pynsngew ïa ka kaiphod ki jingkheiñ ki la pynlyngoh ïa ka party.
U la ong ba ka ‘Expert Committee’ ka la ïohpdiang haduh 1024 tylli ki jingai jingmut, ba kynthup ïa ki kynhun ki riew paidbah, ki riew shimet bad kiwei, hynrei la pdiang ïa ki 547 tylli ki jingai jingmut. “Kaba mut ba ka Sorkar ka peit tang ïa ki 547 tylli ki jingai jingmut bad ka kaiphod ka ïathuh ruh ba na ki 547 tylli, kumba 440 tylli ki ong ba dei ban pynneh kumjuh ïa ka bhah thungkam ha ka Jylla lane ka State Reservation Policy kaba poi sha ka 81%. katba kiba ong ban ai lang baroh kawei (combine) noh kaba mut 80-90% ïa u Khasi, Jaiñtia bad Garo ki don tang 15 ngut kaba long 2.7%, ki don ruh kiba ong ba dei ban bhah katkum ka jingbun paid bad kiba ai jingmut ïa kane ki don tang 5 ngut, kaba poi 0.9%, don ruh kiba ong ba dei ban ai noh khambun ïa ki Khasi-Jaiñtia kiba don tang 6 ngut (1.1%) bad ha kine ki jingkheiñ ba ka Expert Committee ka la pynsngew ngi lyngngoh ba katto ka jingïakhohreh ban pynkylla noh ïa ka SRP, ki jingkheiñ pat ki long kumne,” ong u Bah Thomas.
U la ong ruh ba dei halor ka jingdon ki 440 ngut kiba ai jingmut ban pynneh ïa kajuh ka bhah thungkam ha ka Jylla, ka Expert Committee ka la shim ïa ka rai. “Ka KHNAM ka pynpaw ba kane ka wanrah u dak jingkylli u ba heh ba mano kine ki 440 ngut, ym don jingtip ba bniah ïa kane, na kata ka daw kine ki jingkheiñ ba la wanrah da ka Committee kim long shai,” u la ong.
U la pynkynmaw ba ïa ka Expert Committee la dawa na kawei ka party, la pyntreikam pat da ka Sorkar bad ka Sorkar ka la thung ïa ki dkhot, hynrei ka kaiphod pat kam don jingïapher eiei bad pynpaw ba ka KHNAM ha ka jingïalang ka la kren shibun ki mat ban pynsngew sha u Myntri Rangbah bad pynpaw ba kam hun satia ïa kane ka kaiphod.
U la ong ba ha ka jingïalang ba la khot da ka Sorkar jan baroh ki sengsaiñ pyrthei ki la ïa mynjur bad pdiang ïa kane ka kaiphod jong ka Committee ban pynneh kumjuh ïa ka SRP, hynrei ngi la kylli ïa u Myntri Rangbah ba hato ka Committee ka treikam da kaba peit tang ïa ki jingkheiñ ne ka peit ïa baroh ki bynta jong ka bhah kam u snem 1972.
U Bah Thomas u la ïathuh ba u Myntri Rangbah u Conrad K Sangma u la kren shai ba ka Committee kan peit ïa baroh kawei ka State Reservation Policy kam dei tang ïa ka bhah kam, na kata ka daw ki la pynpaw ba lada peit ïa ka SRP 1972 kumba ka long ha ka Para 1 kaba la thoh ka “Representation of these community in service under the Autonomous State of Meghalaya.”
U la ong ba ka party ka la ai jingmut ba dei ban pynduh pyndam ïa ka kyntien ‘Autonomous’ bad ka party ka la pynpaw ruh ba ka Committee kaba don ïa ki riewshemphang, ki la dei ban peit naduh u laiñ ba nyngkong haduh bakut jong ka SRP, hynrei ka kyntien ‘Autonomous’ ka khlem jah bad kane ka bynta kam pynhun ïa ka party.
