Nongstoiñ, Ïaïong 13
Ha ka 12 tarik mynta u bnai, u EM ba khmih ïa ka khyndew ka shyiap na ka Khasi Hills Autonomous District Council (KHADC), Bah Powell Sohkhlet ryngkat u MDC ka Rambrai, Bah Lurshai Kharbani, u MDC ka Nongstoiñ, Dr. Juristman Ïawphniaw ryngkat ka jingdonlang u Sirdar ka Hima Nonglang bad kiwei kiwei ki nongïalam ha ka jingsynran lang ruh u EAC ka Mawshynrut Civil Sub Division, u SDPO ka Mawshynrut bad kiwei kiwei ki la leit ban jurip ïa u pud u sam jong ka KHADC bad GHADC.
Katei ka jingleit jurip jong ka kynhun na ka KHADC ka long hadien ka jingwan pynpait pynpra ka GSU bad ki briew kiba la kam ba ki dei na GHADC ïa ki mawpud jong ka Kur Nianglang ha Mawkru kaba hap ha u pud u sam ka Hima Nonglang.
Haba kren ha ki lad pathai khubor ha kane ka sngi u Bah Powell Sohkhlet u la ong, ka jingleit ban jurip ïa ki jaka kiba hapoh ka Nonglang Sirdarship, ka dei hadien ba u MDC ka Rambrai Bah Lurshai Kharbani u la ai ka jingthoh sha u CEM ha kaba na ka liang jong u CEM u la phah ïa u kum u EM ba dei peit ïa ka khyndew ka shyiap.
“Ka jingwan jurip ka long ba hadien ba ngi la ïohi ha kine ki sngi ba la dep ba ka la don ka jingpynpait pynpra ïa ki maw kiba don ha ka Hima Nonglang bad kaba hap ha kata ka Mawkru, bad kane ka Mawkru ka don lai tylli ki shnong ka Mawkru A, B bad C, bad kine ki maw, nga kwah ban pynshai ba kim dei satia ki mawpud jong ka KHADC, ki dei ki maw ba la thung da ka kur Nianglang kaba pyni, kaba ïeng na ka bynta ka jingïasam jaka sam puta ka jong ki bad kata ka dei ka jingthmu jong kine ki maw, kam dei satia ki mawpud,” ong u Bah Powell.
Une u EM u la ong, “Nga pynrem jur ïa ki kynhun kiba la pynpait pynpra ïa kito ki maw ha kaba ki la leh ïa kane khlem ka jingtip khlem ka jingsngewthuh hynrei ngi pynrem namar kine ki maw ki long kiba kongsan na ka bynta ka jaidbynriew Khasi, ki long kiba donkam ruh bad nga sngew ban ïaroh ïa ka kur Nianglang kiba la buh ïa kine ki maw khnang ba ki kur ki jait jong kane ka kur kin sngewthuh ïa ka jaka ka puta ka jong ki, ïa u pud u sam u jong ki hapdeng jong ki hi ki para kur khnang kan nym mih ka jingïakajia hadien habud”.
Nangta u la ong kaba ar pat kane ka Mawkru ka hap hapoh u pud u sam jong ka Hima Nonglang bad na kane ka jaka kaba ki kynhun na rilum Garo ki pynpait, ka dang don ka bynta kaba kham sharum kaba pynïakhlad ïa ka East Garo Hills bad ka West Khasi Hills ha kata ka wah Umpait.
U Bah Powell u la ong ruh ba ha u snem 2019, ka la don ka jingïalang kaba la khot da u Commissioner Secretary ka Sorkar Meghalaya kata ha ka 30 tarik Jymmang ba la shim bishar ïa kine arliang mamla ha kaba ïadei bad kane ka jingïakajia jaka lane knieh pud bad la pynskhem ruh halor ka rai jong ka ïingbishar high court ba kine ki jaka ki hap hapoh ka jingpeit ka jingkhmih jong ka West Khasi Hills District.
Shuh shuh u Bah Powell u la pynkynmaw ruh ba ka la don ka jingkylli hapoh ka Council ba u pud u sam jong ka Council u sdang bad u kut hangno, ha kaba u la ong, “Nga la kren shai ha kato ka por ba jubab ba u pud u sam jong ka KHADC u dei beit u pud u sam jong ki Hima Khasi kaba mut hangta kaba kut u pud u sam jong ka Nonglang Sirdarship u dei u pud jong ka KHADC”.
U MDC ka Rambrai Jyrngam Bah Lurshai Kharbani u la ong ba ka jingkynnoh jong ki kynhun seng na rilum Garo, kata ka GSU ba ka don ka jingleh beiñ ïa ki paidbah Garo ka long kaba bakla.
“Ngi ïohi hadien ba ngi la wan, kam shym la don kaei kaei kaba kum kata bad nga kum u MDC ka thaiñ nga tip kham bha naduh hyndai-hynthai ngi bad ki Garo ngi ïa sah lang bad ngim don ïa ka jingïa ibeiñ lane jinglehbeiñ ïa ki hynrei kine baroh ki dei tang ki jingpynshit jongno-re-jongno khnang ban ïoh ka lad ban pynsniew ïa ngi ki ar tylli ki District,” ong u Bah Lurshai.
U MDC ka Rambrai u la ong ba kane ka dei beit tang ka jingsngewthuh bakla jong kita ki kynhun seng ki bym dei na kane ka jaka hynrei kiba dei na rilum Garo.
