Jowai, Ïaïong 13
Ki nongïalam shnong ka Panaliar ha ka 11 tarik Ïaïong ki la leit ïakynduh ïa ka Dr. E. Chullet, Medical Superintendent (MS) ka Maternal and Child Health (M&CH) Hospital kaba don ha Panaliar, Jowai ban pynkynmaw halor ka rukom thungkam thungjam hapoh kane ka Hospital nalor kiwei de ki mat.
U Waheh Shnong, Bah Riquoma Rq. Laloo u la ong ba ka shnong Panaliar naduh ki por mynshwa ka la dawa na ka Sorkar ba ïa ki kam (Post) kiba rit kum ki ‘Grade-IV’ lane ‘Wages’ kiba dang lah ban thung hi da kane ka ‘hospital’, dei ban ailad shuwa ïa ki khun jong ka shnong Panaliar.
Hynrei kumba long mynta bad katkum ka jingïoh jingtip jong ka shnong, u la ong ba ïa ki kam barit baria hapoh kane ka ‘hospital’ la thung sop-sop ïa ki.
U la ong ba hapoh ka District hi baroh kawei, ka don ka District Selection Committee kaba dei peit halor ka thungkam thungjam bad na ka liang ka shnong ruh kam lah ban tuklar halor kane ka bynta, hynrei ïa kino-kino ki kam kiba dang lah hi ban thung da kane ka ‘hospital’, dei ban ailad shuwa ïa ki khun jong ka shnong khnang ba ki khun ka shnong kiba duh kam duh jam kan long ka jingïarap ïa ki.
Halor kane ka bynta, u la pyntip ba na ka liang ka MS ruh ka la kular ban shimkhia katba lah hapoh ka bor jong ka.
Hynrei u pynpaw pat ka jingsngewdiaw ban tip na ka MS ba don ki kynhun sengbhalang kiba wan pynbor ban leh ïa ki kam kiba bun jait haba ïadei bad ka thungkam thungjam.
U la ong ba ka shnong Panaliar naduh mynshwa haduh mynta ka ïeng ha kajuh ka rai ban ym ailad ïa kino-kino ki ‘riewshimet, ki kynhun seng ban wan mushlia ne tuklar hapoh ka shnong ka thaw bad wat ki tnad treikam Sorkar bapher-bapher ruh, ka shnong ka khang pyrshah ba kin leh ïa kino-kino ki kam khlem da ka jingtip jong ka shnong.
Ka shnong ka khlem pyrshah ïa kino-kino ki kynhun ne kynhun sengbhalang ban leh ïa kino-kino ki kam ba bha hapoh ka shnong ka thaw, hynrei dei ban pyntip sha ka shnong haba leh ïa kino-kino ki kam bad ba ka shnong ruh kan ai ka jingïatreilang.
Kawei pat ka mat ba la ïakren ha kane ka sngi ka dei halor ka jinglehsih haba tep ïa i khunlung ba khlad hapoh kpoh ka kmie bad ka shnong Panaliar ka la ai jingmut ïa ka MS ban buh noh da ki aiñ ki kyndon ïa ki longkmie ne longïing kiba ïakynduh ïa kum kine ki jingeh ban rah sha ki shnong ki thaw ki jong ki.
Nalor u Waheh Shnong, la donlang ruh u General Secretary, Bah Marryngkat Syngkon bad ki dkhot EC shnong.
