Nongpoh, Ïaïong 13
Ha ka jingjia tyngkhuh kali ha Umroi Umdohbyrthih ha ka janmiet jong ka Sngi U Blei, kawei ka samla kaba la tip kyrteng kum ka Sidora Langstieh, 29 snem ka rta na ka shnong Nongsder, Block-B, ka la duh noh ïa la ka jingim katba uwei u shynrang ba la tip kyrteng kum u Singh Laloo, 30 snem ka rta na ka shnong Umroi Nongrah u la mynsaw jur hadien ba ka arshaka (scooty) kaba ki shong ka la shah tynrah ha ka trok kaba la pynher sted.
Katkum ka tyllong khubor, la ïathuh ba katei ka jingjia ka dei ha ka por kumba 4 baje janmiet katba utei u Singh uba la ñiah ïa ka scooty kaba don ïa u registration number ML05-AA-9898 lem bad ka Sidora kaba shong hadien, ki dang mih na Umroi Umdohbyrthih ban leit sha Umroi Nongrah, hynrei ynda la poi ha ki bynta ba marjan bad ka Tyndai Resort jong ka surok Shillong Bypass, ki la shah tynrah noh nadien ha kawei ka trok kaba la pynher sted bad phet krad na katei ka jaka hadien katei ka jingjia.
Na ka liang ki pulit ka Khapmara PIC, kiba la hiar mardor sha katei ka jaka ban pynlong ïa ka jingtohkit, ki la lap ba katei ka samla Sidora ka khlad noh hashen katba u Singh pat u la mynsaw jur. Na ka liang ki pulit ki la pynkit noh ïa u Singh sha Bhoirymbong CHC na ka bynta ban pynïoh jingsumar katba ïa ka met kaba sah jong ka samla Sidora la pynkit noh sha jaka buh metïap ka Nongpoh Civil Hospital na ka bynta ban pyndep ïa ki jingdonkam katkum ka aiñ.
Halor kane ka jingjia, na ka lang jong ki pulit ka Khapmara PIC bad na thanat Umïam ki la pynlong ïa ka jingthwet jur ban ïoh bat ïa katei ka trok kaba la phet krad na katei ka jaka ha kaba la pyntip ruh sha ki bor pulit ka thanat Mawryngkneng bad Mawlasnai na ka bynta ban ïoh bat ïa katei ka trok. Hynrei kat haduh ba thoh ïa ka khubor na ka liang ki pulit kim pat lap dien satia.
