Nongpoh, Ïaïong 14
Ka jingjur jong ka jingjia tyngkhuh kali lane aksiden kaba khah-khah ha ki surok bah ka Ri Bhoi District ba kynthup ïa ka National Highway 6 bad ka Shillong Bypass ha kine ki khyndiat taïew ka la wanrah ïa ka jingduh noh jong kiba bun ki mynsiem briew bad ruh kiba ngat ha ki jingmynsaw.
Kine ki jingjia tyngkhuh kali kiba shyrkhei ki la wanrah ruh ïa ka jingsheptieng bad jingsyier ïa ki paidbah nongleit nongwan khamtam kito kiba sakhi dalade ïa ki jingjia tyngkhuh kali ha kine ki surok bah kiba don ha Ri Bhoi District. Ki daw jong ka jingjia khah-khah jong kine ki jingïatyngkhuh kali kumba la pynpaw da ki bor pulit ka Ri Bhoi District, ka dei namar ka jingpynher sted kaba palat pud ïa ka kali, kat haduh ba u nongñiah um lah shuh ban teh lakam, ka jingñiah kali hapdeng ka jingshoh khawiang, ka jingsangeh beaiñ bad khlem akor ha ki surok bah khamtam ha ki jaka ba long khongwaiñ bad ka jingkit palat pud jong ki kali kiba ïaid ha surok. Na ka liang ki bor pulit ka Ri Bhoi District kin dang ïai bteng ban pynlong ïa ka jingpyrkhing ban khmih bniah bad pynlong ïa ka jingtalasi ïa kito ki nongñiah kali kiba pynkheiñ aiñ, kum shi bynta ban ïada ïa ka jingduh jong ki mynsiem briew bad pynlong ïa ka ïaid ka ïeng kaba shngaiñ na ka bynta jong ki paidbah nongleit nongwan.
Ha kajuh ka por na ka liang ki bor pulit ki la buh jingkyrpad ruh ba lada don kino-kino ki ‘riew paidbah kiba lap ïa kum kitei ki jingñiah pynher sted, ka jingñiah buaid, ka jingsangeh khlem akor bad ka jingkit palat pud, ba kin pyntip sha ki pulit ha u nombar 112 khnang ba kin ïoh leh ïa kaba donkam katkum ki kyndon jong ka aiñ.
