Jowai, Ïaïong 14
Ka jingwan ther jong u ‘lapbah ha ryngkat ka lyer bad u phria ka la wanrah ïa ka jingjulor jong kiba bun tylli ki ïing ki sem kiba la shah lied ka tnum bad pei thliew.
Kane ka jingjia shah pynjulor jong ki ïing ki sem na ka jingther u ‘lapbah, ka lyer bad phria ka la jia ha ka shnong Barato ha West Jaiñtia Hills District ha ka 14 tarik Ïaïong ha ka por kumba 1.30 baje nohphai sngi.
Haba ïakren bad u MDC Ma Aiborlang Shadap u la ïathuh ba kane ka jinghap phria ka la wanrah ka jingjulor ïa kiba bun tylli ki ïing ki sem ha kaba bun tylli ki tnum ïing kiba la sop da ki tin ki la shah lied ha ka lyer bad shah pynjot bad pei lut ki tnum.
Ym tang katta, u la ïathuh ba ka um slap kaba la ïoh ban rung shapoh ka ïing na ka jingpei ki tin ba la tap hajrong tnum ka la pynjulor ruh ïa ki mar ki mata kiba don hapoh ïing.
Haba pyrshang ban kylli halor ki jingshah ktah jong ki ïing, ki jingthung jingtep, ki jingri jingdup, u Waheh shnong ka Barato u Ma Stelin Lamare u la ong ba haduh mynta ym pat lah ban ïoh ïa ka jingkheiñ kaba pura hynrei katkum ka jinglum jingkheiñ kaba kyrkieh na ka 1000 tylli ki ïing, 60% dei ki ïing kiba la shah ktah bad bun ki jingthung jingtep kum ki jhur, ki soh ki pai ki la shah pynjulor lut bad ruh ka jingïap ki sniang bad ki syiar.
U la ïathuh ruh ba ha kane ka jinghap slap kam shym la don kano-kano ka jingjia kaba sngewsih.
