Shillong, Ïaïong 14
U MP ka Lok Sabha na Shillong Parliamentary constituency, Dr. Ricky Andrew J Syngkon u la pynpaw ka jinglyngngoh ba ka jingshalan be-aiñ ïa u dewïong ka dang bteng haduh mynta, wat hadien ba ka NGT ka la khang ïa ka jingtih bad shalan dewïong hapoh ka Jylla naduh u snem 2014, ha kaba u la ong ba ka Sorkar India ka dei ban shim da ki sienjam kiba tyngeh pyrshah ïa ki briew ba donkti.
U la ong ba lehse ki briew kiba don bynta ha kane ka kam tih bad shalan be-aiñ ïa u dewïong, katto-katne ngut ki lah ban dei kiba don bynta ruh ha ka Sorkar.
U la ong ba kane ka kam ka dei kaba khia bha naba ka don ka jingbym pyntreikam hok shuh ïa ka aiñ, namar ïa kane ka kam be-aiñ la leh pylleiñ-pylleiñ hakhmat jong ki briew ka aiñ.
“Ha kaba ïadei bad ki briew ba donkti ha ka kam tih dewïong be-aiñ, nga lah ban ong ki don katto-katne ngut lehse kiba don ha ka Sorkar, namar haba la khang, kumno kita ki briew ki leh pyrshah ïa kata kaba la shah khang”, la ong u MP haba kren ha ka Lah Sngi U Blei.
U Dr. Ricky u la pyntip ba u la rah ïa kane ka mat hapoh ka Dorbar Mang Tyngka ha Parliament kaba dang shu dep, da ka mat ïatai ‘Zero Hour’, bad pynpaw ka jingkyrmen ba ka tnat ba dei khmih kan shim kam da kaba tyngeh ïa ki briew ba donkti ha kane ka kam be-aiñ.
“Nga kyrmen ba ka Sorkar India kan shim da ki sienjam kiba tyngeh pyrshah ïa ki briew ba donkti, bad lehse ban pan ruh ka jingpynshai na ka Sorkar Jylla balei ka jia kumne,” la ong u MP haba pynpaw ka jingshaniah ha ka Sorkar India.
Haba kylli, u Dr. Ricky u la ong ba un bteng ban buddien ïa kane ka phang kaba u la rah ha Parliament, bad bynrap ruh ba un ïai buddien ïa baroh ki mat ka Jylla kiba u la kren hapoh ka ïingdorbar ha Delhi, kynthup ruh ïa ka jingeh ha NEHU.
“Ngan bteng ban buddien ïa kane ka kam bad ka tnat ba dei khmih jong ka Sorkar Pdeng namar ka dei ka kam kaba khia bad kaba ktah ïa u paidbah,” u la ong.
