Shillong, Ïaïong 15
Ki runar bym lah ban ithuh satia, ki la dawa pisa na uwei u nongñiah jong ka kali Bolero Pick-up ha ka thaiñ 3 Mer, Upper Shillong.
Katkum ka khubor kaba la ïoh na ki pulit la ong ba ha ka 14 tarik mynta u bnai ha ka por kumba 4 baje dang step, lai ngut ki runar kiba la wan ha kawei ka arshaka, ki la dawa pisa na uwei u nongñiah kali u Shemphang Kurbah, katba u dang ïohthiah ha ka kali Bolero pick-up jong u, kaba don ïa u registration number ML05-AL-3336 ha ki bynta jong ka 3 Mer, Upper Shillong.
La ong ba ha kane ka por, katto-katne ki briew kiba la ïaid lynti na kane ka jaka, ki la leit ban tuklar ïa kane ka kam bad ha kane ka por kine ki runar ki la phet noh bak na kane ka jaka da kaba ieh noh shadien ïa ka arshaka. Haba la pynlong ïa ka jingtohkit halor kane, la lap ba kane ka arshaka ka dei ba la long trai da uwei u briew ba la tip kyrteng kum P Ryntathiang.
