Shillong, Ïaïong 15
Ka Committee on Empowerment of Women (CEW) jong ka ïingdorbar thawaiñ ka Jylla, ha ka Sngi Ba-ar ka la hiar sha shnong Langtor kaba hap hapoh ka Eastern West Khasi Hills District na ka bynta ban buddien halor ka jinglap ïa ka metïap jong kawei ka longkmie bad i khun ba dang ar bnai na kawei ka pukri um.
Kane ka committee ïa kaba la khlieh da ka MLA ka Sutnga ka Kong Santa Mary Shylla kum ka Chairperson, ka la leit sha Langtor da ka jingthmu ban leit pynpaw ïa ka jingsngewlem bad jingïadon ryngkat bad ka ïing ka sem jong kane ka longkmie kaba la khlad.
Lah ban pynkynmaw ba ha ka 2 tarik Lber 2025, ki pulit ki la ïoh tam ïa ka metïap jong ka longkmie ba la kyrteng kum ka Darisha Lyngdoh lem bad i khun ba dang ar bnai na ka pung tong um ha Kynship, Langtor. Kine ki shikmie shikhun ki la jah rngai naduh ka 1 tarik Lber, 2025.
Ka committee ka la leit ban jurip ruh ïa ka jaka ba lap ïa ki ar tylli ki metïap bad pynlong ruh ïa ka jingsngap jar ba ar minit kum ka jingleh burom ïa kine kiba khlad.
Hadien kane, ka kynhun ka la hiar pat sha thanat Mairang ha kaba ka la ïakynduh ïa u Additional Superintendent of Police Bah Pyrkhatlang Suchiang bad ïa u Officer-in-Charge ban shong bishar kam halor ka jingïaid jong ka jingtohkit ïa kane ka jingjia.
Ki dkhot ka committee kiba la ïadonlang ki kynthup ïa ki MLA Bah Matthew Beyondstar Kurbah, Bah Adelbert Nongrum, Bah Brightstarwell Marbaniang, Deputy Commissioner ka Eastern West Khasi Hills Kong Anita Kharpor bad kiwei kiwei.
