Shillong, Ïaïong 15
U Symbud Myntri Rangbah ba khmih ïa ka tnat Transport, Bah Sniawbhalang Dhar u la pyntip ba ka jingpynheh ïa ka kad liengsuiñ ‘Shillong Airport’ kaba don ha Umroi, kan sa sdang noh shen ban pynthikna ba ki liengsuiñ kiba kham heh kin lah ban hiar ban kiew ha u snem ban wan.
“Ngi la ïoh ka khubor kaba bha. Ka Airport Authority of India (AAI) ka la khot tender ban pynheh ïa ka kad liengsuiñ jong ka Shillong bad nga kyrmen ba hapoh u snem 2026 ngin sa lah ban ïohi ïa ki liengsuiñ kiba heh ban hiar ha kane ka kad liengsuiñ,” la ong u Bah Dhar haba kren ha ka Lah Sngi U Blei.
U la ïathuh ba ka jingshim jaka ka la jan dep bad shen yn siew noh ruh ïa ka bai jaka, ha kaba u la pyntip ba baroh ki kam ki la ïaid beit, kaba pynlong ïa ka AAI ban khot kloi noh ïa ka tender.
Ka AAI ka la pynmih ïa ka jingpynbna khot tender ha ka 5 tarik Ïaïong, 2025 na ka bynta ban pynheh ïa ka kad liengsuiñ jong ka Shillong, bad kane ka sienjam ka wan ha ka jingïalam da u Myntri Rangbah ka Jylla u Conrad K Sangma, uba la kular ban shim khia na ka bynta ban pynheh ïa ka kad liengsuiñ.
Ka jingpynheh ïa ka kad liengsuiñ ka kynthup ïa ka lynti ïaid liengsuiñ (Runway) kaba la don lypa bad jrong 571 meter, da kaba pynheh sha ka 2,400 meter.
Kane ka jingpynheh kan pynsuk ïa ka jingpynïaid ïa ki liengsuiñ ba heh ha Shillong. Nalor kata, kane ka projek ka kynthup ïa ka jingpynheh ïa ka Terminal bad ka Apron, ryngkat bad ki kiwei ki kam ban pynbha shuh-shuh ka jingtreikam jong katei ka kad liengsuiñ.
Katkum ka jingpynbna tender jong ka AAI, ka jinglut jong kane ka projek ka long T.119.44 klur, bad ka por ba la khmih lynti ban pyndep ka long 18 bnai.
Ka AAI ka la aiti ïa ka Draft Master Plan ban pynheh ïa ka liengsuiñ ha u Nailar, 2024 bad ka jingshim jaka ban pynheh sa kumba 22 akar na ka bynta katei ka projek ka la ïaid shakhmat.
Ka jingpynheh ïa ka kad liengsuiñ jong ka Shillong la khmih lynti ba kan pynbha shibun ha ka liang ka jingïadei bad ki nongbah ha kylleng ka ri India, bad kan kyntiew ha ka jingwan ki nongjngohkai pyrthei, kan kyntiew ruh ïa ki kam khaïi bad ka jingpynïasoh ïa ka Meghalaya bad kiwei pat ki Jylla ka ri India.
