Shillong, Ïaïong 15
Ki nongïalam ka Meghalaya 4th Teachers Association ryngkat ka jingïadonlang bad ki nongïalam jong ka Meghalaya SSA Schools Association (MSSASA) ba la lamkhmat da u President, Bah Aristotle C Rymbai, ha ka 15 tarik mynta u bnai ki la leit ban ïakynduh ïa u Vijay Kumar Mantri, IAS, Commissioner & Secretary ka tnat pule puthi, ban ai jingmut bad ban jingpynshai halor ka jingbym sngewthuh ïa ka jingthmu jong ka Sorkar ban shimti noh ïa ki skul SSA bad ïa kiwei pat ki skul ba la pynïaid da ki kynhun niam bapher-bapher.
Haba kren sha ki lad pathai khubor ha kane ka sngi hadien ka jingwan ïakynduh ïa u Commissioner & Secretary, u Bah Aristotle u la ong, halor kane ka jingthmu jong ka Sorkar, ki la mih shibun kiei-kiei ki jingbym sngewthuh halor kane ka rai bad kiba bun tylli ki skul shimet bad ki skul ba la seng da ki kynhun niam, kim lah ban ai jingmynjur halor katei ka jingtyrwa ka Sorkar namar ka jingbym pat lah ban pynkohnguh ïa ki School Managing Committee.
Halor kane, u Bah Aristotle u la ai jingmut ïa u Commissioner & Secretary ba u dei ban ailad ïa ki nongpynïaid skul sa mynta u bnai Ïaïong ba kin shong pyrkhat halor katei ka jingtyrwa ka Sorkar khnang ba ki nongpynïaid skul kin ïoh ïa ka lad ban pyrkhat sani bha halor kane ka jingtyrwa ka Sorkar.
“U Commissioner & Secretary u la kular ïa ngi ba un sa pynjlan ïa ka tarik haduh kaba kut jong une u bnai na ka bynta ki skul ba kin shim ïa ka por jong ki ban pyrkhat haba ïadei bad kane ka jingthmu jong ka Sorkar hapoh une u bnai Ïaïong”, ong u Bah Aristotle.
U Bah Aristotle u la ai jingmut ruh ïa u Commissioner & Secretary ba kito ki skul kiba la aiti da ka mon sngewbha jong ki ban ai pynïaid noh ïa ki skul na ka SSA sha ka tnat pule-puthi ka Jylla, ka tnat ka dei ban khmih bad pynïaid noh shakhmat katkum ki rukom treikam ka tnat.
Na ka bynta ki skul kiba ki School Managing Committee (SMC) kim kwah ban aiti ïa ka jingpynïaid skul sha ka Sorkar, u Bah Aristotle u la kyntu ïa ka Sorkar ba ka dei ban ailad ïa ki nonghikai SSA ba kin shakri haduh ban da shongthait bad ban ai ïa ka tulop kaba ïaryngkat bad ki nonghikai SSA kiba la long pura.
“Ngi la ai jingmut ruh ba ïa kito ki skul SSA kiba la pynïaid da ki riew shimet, ki mishon ne ki kynhun seng ki bym kwah ban aiti ïa ka jingpynïaid skul sha ka Sorkar, ngi la ai jingmut ba ki dei ban ailad ïa ki nonghikai ban bteng ha kito ki skul da kaba na ka liang ka Sorkar kan ai ïa kajuh ka jingmyntoi kumba ai lem ïa ki nonghikai kiba long kloi ban ai ïa ka jingpynïaid na ka SSA sha ka Sorkar”, ong u Bah Aristotle.
Shuh-shuh, u Bah Aristotle u la ai jingmut ruh ïa ka Sorkar ba kito ki skul ki bym kwah ban ai ïa ka jingpynïaid skul sha ka Sorkar, ka Sorkar ka dei ban pynïar ïa ka Grant-in-Aid (GIA) sha kine ki nonghikai, da kaba tyrwa ïa ka rukom siew tulop ryngkat bad ka Basic Pay, ka Dearness Allowance (DA), bad ka jingpynkiew tulop kaba 3% manla u snem.
Nalor kata, u Bah Aristotle u la ai jingmut ruh ïa ka Sorkar ban pynkynriah noh ïa ki nonghikai na ki skul SSA kiba duna bha ki khynnah skul ne ki bym don khynnah skul da kaba buh noh ïa ki nonghikai sha kiwei pat ki skul khnang ba kin lah ban bteng ïa ka kam shakri jong ki.
U la ïathuh ba na ka liang u Commissioner & Secretary un sa khot biang ïa ka jingïalang ban ïakren kham bniah shuh-shuh halor kane ka mat hapdeng ki ophisar ka tnat pule-puthi bad ki nongïalam jong ki nonghikai ka Meghalaya SSA School Association bad ka Meghalaya 4th Teachers Association.
