Nongpoh, Ïaïong 15
Ki bor ba dei khmih jong ka tnat Wildlife ha ka Sngi Ba-ar ki la lap ïa ka metïap jong uwei u hati khlaw ha ki bynta jong ka khlaw kaba dang hap ha 14 Mer jong ka thaiñ Byrnihat jong ka Ri Bhoi District ha kaba la suba jur ba u la ïap na ka daw jong ka jingshah bat bording ilektrik.
Ha ka jingleit jurip bad tohkit ïa katei ka jaka da ki bor ka tnat Wildlife ba la lam khmat da u Bah Leening Wahlang, Range Forest Officer, la lap ïa ka metïap jong utei u hati khlaw bad katkum ka jinglap, la suba ba lehse utei u hati khlaw, u la kum tyngkhuh bad ki sainar ilektrik kiba khlaiñ bor, kiba ïaid lyngba na katei ka khlaw kat haduh ba un da khlad syndon hajuh.
