Shillong, Ïaïong 15
U Nongïalam ka National People’s Party (NPP) uba dei ruh u MP ka Rajya Sabha na Shillong, Dr. WR Kharlukhi u la ong ba ka kam wanrah lynti rel ha ka jingshisha ka la kut naduh ba ka Sorkar Jylla ka la pynphai noh ïa ka T.200 klur ba la mang da ka Sorkar Pdeng ban thied jaka na ka bynta ban shna lynti rel ha Jylla.
“Ka Sorkar Jylla ka la pynphai ïa ka pisa kumta ka mat ka la kut noh hangne” ong u Dr. Kharlukhi haba ïakren bad ki lad pathai khubor ha ka Sngi Ba-ar.
Kane ka jingkren jong u MP ka long haba kynthoh ïa ka rai jong ka Sorkar Jylla ban thaw ïa ka All Party Committee (APC) ka ban shong bishar ïa ka kam pynïasoh lynti rel ha Khasi bad Jaiñtia Hills.
“Mynta ba ki (Sorkar) la pynphai ïa ka pisa nangno pat kin ïoh biang ïa ka pisa?” u la buh jingkylli.
Katkum ka jingong u Dr. Kharlukhi, ka All Party Committee lehse ka lah ban dei na ka bynta ka jingwanrah ïa ka projek lynti rel hadien-habud.
Halor ka jingpynbna jong ka Voice of the People Party (VPP) ban ym ïashim bynta ha ka All Party Committee ban ïakren lynti rel, u Dr. Kharlukhi u la ong, ba ka Sorkar ka donkam ka dei ïa ka Liang Pyrshah kaba tei.
“Ngam tip satia ba da ka jingbym treh ban donlang ha kane ka committee kan dei kaba tei ne ka ban pynjot,” la ong u Dr. Kharlukhi.
