Shillong, Ïaïong 15
U MP ka Lok Sabha na Tura Parliamentary constituency, Saleng A Sangma u la maham ba lada ka Sorkar India bad ka Sorkar Jylla kim leh eiei mardor ban pyrkhing ïa ka jingwan rung ki briew nabar, ki trai shnong Khasi-Jaiñtia bad Garo kin sa jah klep noh syndon.
U Saleng u la ong ba lada wan rung ki phetwir Muslim Rohingya kiba shah beh na Myanmar kiba don kumba 50 lak ngut, shaei ki trai shnong kiba don tang 30 lak ngut kin leit?
U la ong ba kine ki briew ki la long ki phetwir na Bangladesh bad ki lah ban krih kylleng kane ka thaiñ Shatei Lam Mihngi ka ri India, bad lada ym lah pyrkhing ka Jylla Meghalaya kan sa long ka North Bangladesh syndon ynda la wan buhai shnong kitei ki phetwir.
“Ka Meghalaya ka don tang 30 lak ngut tam ki nongshong shnong, lada wan ki Rohingya haduh 50 lak ngut, shaei ngin ïaphet? Hato ngi lah ban ïaleh?”, la ong u Saleng bad bynrap ruh da kaba ong, “Lada ym tehlakam mynta, ka Meghalaya kan kylla long ka North Bangla.”
U Saleng u la kren ruh ïa kane ka mat hapoh ka dorbar Parliament ba ka donkam ban pynkhlaiñ ïa ki BSF bad ka jingker sainar ha khappud ban ïada na ka jingwan rung ki briew na khappud ka India-Bangladesh.
U MP ka Congress na ka Jylla u la ong ba ka dang don ka jingkyrmen ïa ka jylla Meghalaya lada leh eiei noh mynta ban khang lad ïa ka jingwan rung ki briew ba nabar.
Katkum ka jingïathuh u Saleng, ïa kane ka mat u la ïakren ruh bad ki bahalor jong ki shipai BSF, kumjuh bad ka tnat Kam Pohïing ka ri ban ïakynduh lang ïa ki BSF, ki Deputy Commissioner halor kane ka kam.
Haba pynpaw ka jingsngewkhia ïa ka jingwan rung ki briew na Bangladesh lyngba ka Meghalaya, u MP u la ong ba ki briew kiba sah ha khappud Meghalaya-Bangladesh ki shah pyndik man ka por na ka jingwan rung ki briew nabar, naduh ki dakaid, ki runar bad kiwei-kiwei kiba wan leh kam sniew nalor ba ki dei kiba shu wan rung be-aiñ.
