Shillong, Ïaïong 15
U MP ka Jylla sha Rajya Sabha uba dei ruh u Nongïalam ka National People’s Party (NPP), Dr. WR Kharlukhi u la thalaiñ ïa ka Voice of the People Party (VPP) kaba dawa ïa ka jingtohkit ba laitluid halor ka jingkynnoh bym lah ka Sorkar ban pynlong ïa ka ilekshon kaba khuid bad bym shah liang ha Jaiñtia Hills Autonomous District Council (JHADC).
U la ong ba ka VPP ka long pyrshah ïa ka jingpyndonkam ïa ka bor dohksah, katba ka kyrshan pat ïa ki kam runar.
U Dr. Kharlukhi u la ong ba u ïohi ha kawei na ki kot khubor ba ka VPP ka dawa ïa ka jingtohkit halor ka jingshah rem ha ka ilekshon JHADC kaba dang shu dep.
“Kumba ong u MLA jong nga na Jowai, kine ki briew ha ka jaka ba ki rem ilekshon ki ong ba ka dei ka bym leh hok, katba ha ka jaka ba ki jop pat ki ong ba ka dei kaba biang,” u la ong haba shim ïa ka jingkren u Bah Wailadmiki Shylla.
Haba shim ba ka jingdawa jong ka VPP ba ka jingpyndonkam ïa ka bor dohksah ka dei ka daw bah halor ka jingshah rem ha ka ilekshon JHADC ka dei ka bym don nongrim, une u Nongïalam ka NPP u la ong ba u dang don ka dur khih (video) jong kaei kaba la jia hadien ka ilekshon, ha kaba ka ïingsah jong u nongkyrshan ka NPP ka la shah thombor bad shah kawang maw.
“Ngam ïohi ba ki briew kiba kam ba ki ieid ïa ka jaidbynriew ba kin pynrem halor ka ïing briew kaba shah pynjulor, ka dei ka ïing ki nong Jaiñtia bad nga khlem ïohi satia ïa ka jingpynrem na ki nongïalam kiba kam ba ki ieid ïa ka jaidbynriew,” u la ong.
Haba kynthoh shuh shuh ïa kane ka jingdawa jong ka VPP, u Dr. Kharlukhi u la ong, “Ki ong ka bor dohksah, hynrei kane kam dei kaei-kaei ruh ka dei ki kam runar, kaba mut ki long pyrshah ïa ka bor dohksah katba ki kyrshan pat ïa ki kam runar.”
