Shillong, Ïaïong 15
Ki pulit bad ki BSF ki la ïoh ban kurup ganja ba don haduh kumba 14 kilo tam na ki ar jaka.
Katkum ka khubor na ki pulit la ong ba ka la don ka jingujor ba ha ka 13 tarik mynta u bnai, ha ka por kumba 9.30 mynstep, ki pulit ki la bat ïa kawei ka arshaka kaba don ïa u registration number AS11-X-2819 ba la ñiah da u Bishal Riang (23 snem) ha Nongsning, NH-6 ha East Jaiñtia Hills bad ban kurup ar tylli ki song kiba la thep bha u ganja ba don jingkhia kumba 11.068 kilo.
Ha kawei pat ka khubor, la ong ba u Coy-Commander, E-Coy jong ka 50 Bn., BSF, BOP Kalaichar ha South West Garo Hills u la ai ka jingujor ba ha ka miet jong ka 11 tarik mynta u bnai, ki shipai BSF ki la ïohi ïa ka jingïaid lynti jong ki nongkhaïi tuh bym lah ban ithuh hapoh ka BOP Kalaichar (SWGH) bad ïoh kurup kawei ka song kaba don u ganja uba khia kumba 3.387 kilo na kane ka jaka ba ïaid lynti kitei ki runar. Hynrei la ong ba kitei ki nongkhaïi beaiñ ki la phet krad noh na katei ka jaka.
