Shillong, Ïaïong 15
Ban pynthikna ïa ka jingshngaiñ jong ki khynnah pule ka jylla, ka Sorkar Jylla lyngba u Commis-sioner & Secretary ka tnat Pule Puthi, ka la bthah bad ai jingmut ïa ki kmie ki kpa ne ki nongsumar bad nongpeit ïa ki khun jong ki, ba kin shim bad pynthikna ïa ki lad jingïada kiba donkam haba ki phah ïa la ki khun ba kin leit pule shabar jylla.
Ka Sorkar ka la buh katto-katne ki jingai jingmut ki ban long ki lad jingïada kiba kum ki kmie ki kpa ki dei ban bud na ka bynta ka jingshngaiñ jong ki khun- kita ki long ban wad ïa ki jaka pule ba la ithuh da ka Sorkar, ban jied ïa ki hostel kiba la ithuh da ka Sorkar.
La ai jingmut ruh ba kum ki kmie ki kpa, kin kiar na ki jaka pule bym pat pynrung kyrteng ne ki bym pat pynshisha da ka Sorkar, bad ha shwa ban buh skul ha kino kino ki jaka pule, dei ban wad bniah bad pynthikna ba ka hostel kan long kaba bit ba biang ha ka liang ki jingsumar, ki lad jingïada, bad ban peit ïa ka jingshimkhia ki nongtrei ha kata ka hostel.
Shuh shuh la ai jingmut ruh ba dei ban ïakren barabor bad ki khun da kaba phone ne ban leit peit man ka por ïa ki na ka bynta ban peit bniah ïa ka jinglong jingman ka jaka sah ne jaka pule khnang ban tip ïa ka jingeh kaba ki khynnah don.
Kumjuh, ka Sorkar ka la kyntu ba lada ki lap ba ka hostel ka leh ïa kino-kino ki kam beaiñ dei ban pyntip sha ki bor shnong lane ïa ki tnat pule puthi bad ha ki bor ka aiñ.
Nangta dei ban pynbiang ïa ki khun da ki phone number jong ki bahaïing ne ki briew ba lah ban shaniah ba ki lah ban pyntip lada jia kano-kano ka jingjia ba kyrkieh ïa ki, bad leit jngoh ïa ka hostel ban pynthikna ba kin don ïa ki kyndon ba donkam jong ka jingshngaiñ bad ka jingkhuid jingsuba.
Na ka bynta ki khynnah ne samla pule pat, ka Sorkar ka la kyntu ba ki dei ban pyntip ha ki kmie ki kpa lane ha kiba ki sngewjan lada ki shem jingeh ha kano-kano ka liang, bad ban tip ïa ki hok jong ki ban ujor lada don kino-kino ki jingpynkheiñ ïa ki kyndon ha ki jaka sah ne jaka pule, kumjuh ki dei ban buh ïa ki lad jingïarap kiba kyrkieh kynthup ïa ki ‘helpline number’ jong ka jylla Meghalaya, jong ka tnat pulit, jong ki bahaïing bad kiwei kiwei kiba ki lah ban shaniah.
Ka Sorkar ka la pyntip ruh ba kin pyntip ha u National Child Helpline Number 1098 bad CM Connect 18003456851 lada ki don kino-kino ki jingpyntip ba kyrkieh.
Kane ka jingai jingmut jong ka Sorkar ïa ki kmie ki kpa lehse ka dei hadien ka jingjia jong ka jingkhlad noh jong 2 ngut ki khynnah skul na ka jylla naba bam ïa ka bam ba la sam ha kawei ka hostel ha Karnataka.
