Shillong, Ïaïong 15
Ka Sohra Civil Sub-Division ka la pynmih ïa ki jingbthah na bynta ki nongjngoh kai pyrthei bad ki nongshang kai kiba wan sha ka thaiñ khnang ba ka jingwan jngoh kai jong ki kan long kaba sngewtynnad bad kaba shngaiñ ym tang ïa ki hynrei ïa kiba ieid ba thoiñ kumjuh.
“Khnang ban pyntikna ba ka jingwan jngoh jong phi kan long kaba sngewtynnad bad kaba shngaiñ, ngi kyntu ïa phi ban long kiba husiar ha ki sawdong-sawkun jong ki jaka um, ki jaka ba long thieb, ki jaka khlaw, bad ki kliar lum kiba lah ban buh jingma, ki bym lah ban tip lypa, khamtam ha ka por slap,” ong ka kyrwoh na u Additional Deputy Commissioner (ADC) ka Sohra Civil Sub-Division, Sohra.
Haba phai sha ki jingbthah ba donkam ba ïadei bad ka jingshngaiñ ha ka liang ki tyllong um, ka kyrwoh ka kyrpad ïa ki nongjngoh kai ba kim dei ban leit hi marwei sha ki jaka um naba ka jingkhlaiñ bad ka jingkiew kynsan jong ka um ka lah ban buh jingma ïa ka jingim jong ki.
“Kiar na kaba jngi ha ki jaka ki bym tip ne kiba la khang – ki jaka maw ba la buhrieh, ki pung ba jylliew, bad ka um ba tuid napoh ki buh ïa ka jingma kaba khraw. Dei ban da peit bha ïa ki khynnah – khang ïa ki ban leit shajan ki jaka ba long thmit ne ka jaka ha kaba ka um ka tuid sted,” ong ka kyrwoh na u ADC.
Haba ïadei bad ki jaka ba long thieb bad ki kliar lum, la bthah ban neh lane ïaid beit ha ki lynti ba la buh dak bad ban kiar na ki jaka ba long thmit bad ki maw ki bym skhem namar ki lah ban ïalam sha ka jinghap.
La bthah ruh ïa ki nongwan jngoh kai ban kiar na kaba shaniah ha ki kliar lum ne ki jaka ba long thieb kiba jrong namar ka jingbtuit kynsan ne ki jingbeh jong ka lyer ka lah ban buh jingma ïa ka jingim jong ki.
Ha kajuh ka por, dei ban pyndonkam ïa ki juti kiba skhem bad ki bym btuit namar ki jaka kiba sngem ne kiba long at ne them ki kham buh jingma haba phai sha ki jingjia aksiden.
Ha ka liang ki jaka khlaw, la bthah ïa ki nongjngoh kai pyrthei ban ym ieh noh na ki lynti ïaid kiba la pynithuh.
“Ki jingthung jingtep kiba rben ki lah ban buhrieh ïa ki jingma kum ka jingbym biang ha ka khyndew ne ki mrad khlaw. Kiar na kaba ktah ïa ki jingthung ki bym tip namar don kiba lah ban long bih ne kiba thar shiah,” ong ka kyrwoh.
Nalor kane, la bthah ruh ïa ki nongjngoh kai kiba kwah wad bniah halor ki jaka, ba ki dei ban shim da ki nonglam lynti ba la pynskhem bad kiba la shah hikai ki ban bishar bad ki ban wad ïa ki lynti ïaid ha baroh ki jait jaka.
Ka kyrwoh ka bthah ruh ba dei ban peit ïa baroh ki dak jingmaham bad ki jingkhang, kumjuh halor ki jingtip shaphang ka jinglong-jingman ka suiñbneng namar u slap uba jur u lah ban pynsniew ïa ki jinglong-jingman, kaba pynlong pat ïa ki lum ban btuit bad ban ym lait ïaid ha kiba bun ki jaka.
Shuh shuh ka kyrwoh ka bynrap ba ban pyntikna ïa ka jingshngaiñ hapoh ka thaiñ Sohra, baroh ki jaka jngohkai ba la buh kyrpang ki dei ban pynbiang ïa ki ‘Lifeguard’ lem bad kito ki ban khmih ïa ka jingshngaiñ (kiba la shah hikai) – ha ki jaka ba don um bad ki jaka ba don jingma kumjuh ban peitngor ïa ki nongwan jngohkai bad ban jubab ne shim ki sienjam lada don kino-kino ki jingjia ba kyrkieh.
La bthah ruh ban pynïeng ïa ki jingker kiba skhem ha ki kliar lum bad ki jaka peitkai kiba long thieb bad ban pynbiang ïa ki dak lynti kiba shai ha ki jaka khlaw bad ki jaka lum ban ïada na ka jingbym sngewthuh bakla ha ka lynti ïaid.
Ha kano-kano ka jingjia ba kyrkieh, kynjoh sha ki pulit ka Sohra – +917638900103 bad Sohra Community Health Centre – +918837360612.
