Shillong, Ïaïong 15
Ka Myntri ba khmih ïa ka tnat ka Koit ka Khiah ha ka Jylla, Kong Ampareen Lyngdoh ka la ong ba ki don haduh 80 percent kiba la pynrung kyrteng ïalade ha ka Megha Health Insurance Scheme (MHIS), hynrei ym baroh kiba la pynïasoh bad u Aadhaar, kaba wanrah jingeh ban ïoh jingïarap ha ka por ba shitom jur.
Haba kren ha ka Sngi Ba-ar, ka la ong ba ki nongshong shnong kiba kwah ban ïoh jingmyntoi na ka skhim Sorkar kum ka Megha Health Insurance Scheme (MHIS), ki donkam ban don ïa u Aadhaar, bad ka Sorkar ka la pynshai man ka por ïa ki nongshong shnong halor kane ka jingdonkam.
Ka la ong ba ka jingpynïasoh ïa u Aadhaar bad ka MHIS lane bad kiwei-kiwei ki skhim ka long kaba hap ban leh beit ban lait na kano-kano ka jingeh bad ka jyrwit-jyrwat.
Haba pynpaw ba ka jingpynïasoh Aadhar ka long kaba kongsan ban ïoh ïa kine ki skhim, ka Myntri ka la kyrpad ïa ki nongshong shnong kiba kwah ban ïoh jingmyntoi na ka skhim MHIS jong ka Sorkar Meghalaya, ki dei ban pynïasoh noh bad u Aadhaar khnang ba ha ka por ba ki donkam ïa ka jingtuklar ka Sorkar, kan long kaba la khreh bad ba lah ban ïoh pyndonkam.
Ka Myntri ka la pyntip ba ka Sorkar ka la shim ïa ki sienjam na ka bynta ban pynbun ki paidbah kiba pynïasoh Aadhaar.
“Baroh ki jaka sumar ha ka Jylla kin don ïa ki lad pynrung kyrteng ha u Aadhaar. Ngi la ïatreilang bad baroh ki tnat ba dei khmih, ki Block ophis, ki DC ophis ki ban pynthikna ba ki nongshong shnong ki lah ban pynrung kyrteng ïalade bad ka MHIS jong ka Sorkar Meghalaya,” ka la ong.
Ka Kong Ampareen ka la ong ba kumba ka ïohi mynta, ka la don ka jingmih jong ki paidbah ban leit pynrung kyrteng Aadhaar, hynrei ha kajuh ka por ka la pynpaw ïa ka jingsngewsih ba katto-katne na ki nongshong shnong ki la hap ban buria na pla lajong haba ki shitom jur tang namar ba kim pat shym la pynïasoh bad u Aadhaar.
“Mynta, lada ki nongshong shnong ki kem pang bad shitom jur, ngi la pyrshang katba lah ban pynïasoh ïa u Aadhaar jong ki wat la ki don ha ki jaka sumar,” la ïathuh ka Myntri.
Ha kajuh ka por ka Kong Ampareen ka la ïathuh ba haduh mynta kumba 80 percent ki nongïoh jingmyntoi na ka Megha Health Insurance Scheme (MHIS) ki la pyndep ban pynrung kyrteng ha u Aadhaar.
“Ngi la bun bha ki briew ba la pynrung kyrteng ha ka MHIS. Ka sien khatduh ba nga shong bishar kam bad ki ophisar, ka jingpynrung kyrteng ha ka MHIS ka la kot ïa ka 80%. Ha nga kane ka dei kaba la heh, hynrei ym baroh ki la pynïasoh Aadhaar. Ka jingeh kan mih haba ki ïoh ïa ka jingpang ba jur,” ka la ong.
