Mawkyrwat, Ïaïong 15
Ka Hynñiewtrep Youths’ Council (HYC) Mawthawpdah Area Unit lem bad ka Hynñiewtrep Integrated Territorial Organisation (HITO) ki la aipor haduh 3 bnai ïa ka MePDCL ba kan ker noh ïa ki transformer ha ka thaiñ Mawthawpdah.
Kane ka jingaipor jong kitei ki seng ka la long ba hadien bunsien ba ki la leit ban buh jingthoh bad ïakynduh ruh ïa u Deputy Commissioner jong ka South West Khasi Hills District ban kyntu ïa ka tnat MEPDCL Mawkyrwat Division na ka bynta ban ker noh ïa ki transformer ha ka thaiñ Mawthawpdah na ka bynta ka jingshngaiñ ïa ki khynnah bad ki jingri jingdup jong ki shnong bapher bapher hadien na ka liang ka ophis MePDCL kam shym la pynsngap satia.
Kine ar seng hapoh ka jingïalam u samla Welman Lyngiong ha ka 15 tarik u Ïaïong 2025 ki la leit ban ïakynduh ïa u SDO jong katei ka ophis ban ïakren markhmat halor ka jingdonkam ban ker noh mardor ïa kitei ki transformer kiba khlem jingker bad ap jingma ïa ka ïaid ka ïeng jong ki paidbah.
Ha katei ka jingïakynduh, ki ar seng ki la pynpaw ïa ka jingkmen hadien ba na ka liang u SDO u la kular ba un sa shimkhia ïa katei ka kam bad ki ar seng ki la aipor ruh ïa ka ophis hapoh lai bnai ba kan sdang noh ban ker ïa ki transformer bad kitei ki ar seng ki la byrngem ruh ba lada ka ophis ka dang pynsahteng kim banse ban shim da kiwei pat ki sien jam kiba kham tyngeh.
