Jowai, Ïaïong 16
Ka Village Defence Party (VDP) jong ka Bakur ka la ïoh ban bat ïa 3 ngut ki suba nong Bangladesh ha ka miet 15 tarik na Madan Phutbol ka shnong Bakur, West Jaiñtia Hills District.
Ïa kine lai ngut la ithuh kum u Md Sujon (28 snem), u Md Sujon (38 snem) bad uwei uba dang 17 snem ka rta.
La ïathuh ba kine suba nong Bangladesh la kynnoh ba ki phrung tuh na ka Madan Phutbol da ka jingthmu ban leit sha Guwahati, Assam.
Na kine ki briew la kurup ïa ki Aadhaar Card bad ka jaka sah ka paw ba ki dei na Hatipara, Nagaon District, Assam.
Halor kane, na ka liang u Waheh Shnong Bakur, Bah Wesper Lamin u la mudui da ka ejahar ha Dawki Police Station pyrshah ïa kine lai ngut suba nong Bangladesh.
U Bah Wesper u la kyrpad ïa ki bor jong ka aiñ ban shimkhia bad pynshitom ïa ki katkum ki kyndon jong aiñ namar lada ki nong Bangladesh ki ïoh lad ban wan rung kyrthep shapoh u pud u sam ka ri, kan buh jingma ïa ki nongshong shnong bad ka shongsuk shongsaiñ jong ka shnong.
