Shillong, Ïaïong 16
Ka Myntri ba khmih ïa ka tnat ka Koit ka Khiah ha ka Jylla, Kong Ampareen Lyngdoh ka la ong ba ka ‘tender’ ba khot ban pynïaid ïa ka 108 ka dang don hapdeng ka jingeh bad ki jyrwit-jyrwat.
Ka la ong ba man ka por ba ka Sorkar ka khot tender, ka la mih ka jyrwit-jyrwat haduh ba ka Sorkar kam pat lah ban jied ïa ka kynhun ne kompani ban pynïaid ïa ka 108.
“Ka long kaba kongsan ba ka jingpynïaid ïa ka 108 ka dei ban long da ki kynhun lane kompani kiba ïoh ïa ka tender, namar ba ki nongtrei ka 108 kin ïoh ki jingmyntoi haba ki la trei bad kata ka kompani kaba pynïaid,” la ong ka Kong Ampareen haba kren bad ki lad pathai khubor.
Ka la ong, namar ba ka Sorkar kam pat ïoh ne pat jied ïa ka kompani ban pynïaid ïa ka 108, ïa mynta ka dang aiti beit ban pynïaid shwa ha ka National Health Mission (NHM) haduh ban da pynbeit da kumwei pat. Ka la ong ba ka Sorkar ka hap ban bishar bha ha kaba ïadei bad ka jingbit jingbiang ki nongtrei jong kane ka bynta, bad dei na kane ka daw ka dang sahteng bad ka jingïakhun hapdeng kiba thep ‘tender’ ka long kaba jur bha namar haba khot ‘tender’ ki don bun ki kompani kiba wan nabar ruh ban thep ‘tender’. Ka Myntri ka la ong ba ka ‘tender’ na ka bynta ban pynïaid ïa ka 108 ka jyrwit-jyrwat man ka por, bad kumba long mynta ïa ka 108 la pynïaid da ka NHM, hynrei kane kam dei ka lynti ban weng ïa ka jingeh bad ka Sorkar ka dang pynshong nongrim ban jied ïa kiba lah ban pynïaid ïa ka 108.
“Wat la ka NHM ka pynïaid bha, hynrei ka donkam ban pynbiang ruh ïa ki jingdonkam jong ki nongtrei. Ka jingïakhun ban ïoh pynïaid ïa ka 108 ka long kaba ïakob bad tan tyllai bha hapdeng ki kompani ba thep tender,” la ong ka Kong Ampareen.
