Jowai, Ïaïong 16
Ka Jaiñtia Students’ Union (JSU) ha ka 16 tarik Ïaïong ka la kyntu ïa ka Jaiñtia Hills Autonomous District Council (JHADC) ba kam dei satia ban ai kano-kano ka No-Objection Certificate (NOC) na ka bynta ka jingpyntreikam ïa ka projek lynti rel namar ka jingbym don ïa ki lad jingïada kiba biang na ka jingwan rung kyrthep ki briew kiba nabar kum ka Inner Line Permit (ILP).
Ha ka dorkhas ba la phah sha u CEM ka JHADC, u Bah Thombor Shiwat, ka JSU ka la pynpaw ka jingpyrshah kaba jur halor kano-kano ka jingthmu ban ai NOC sha ka Northeast Frontier Railway (NFR) na ka bynta ka jingshna ïa ki lynti rel, steshon rel ne kino-kino ki jingtei kiba ïadei bad ka projek lynti rel hapoh Ri-lum Jaiñtia.
“Ngi kyntu ïa ka JHADC ba kam dei ban ai ïa kano-kano ka jingbit ne jingmynjur ïa kiba kum kine ki projek tad haduh ba ka Sorkar Meghalaya kan ïoh ïa ka jingbit na ka Sorkar India ban pyntreikam ïa ka Inner Line Permit (ILP) ha ka jylla,” ka la onG.
Ka seng ka la ong ruh, “Ka jingai NOC khlem ka ILP ka lah ban lam sha u pud ban ym lah ban tehlakam ïa ka jingwan rung kyrthep ki briew kiba nabar bad ka ban buh jingma ïa ka jinglong-jingman, ïa ka kolshor bad ïa ka tynrai jong ki paid Jaiñtia bad ki trai-muluk ka Jylla Meghalaya hi baroh kawei.”
Nalor kata, ka JSU ka dawa ruh na ka JHADC ba kan pynsangeh noh mardor ïa ka jingai ‘Trading License’ lane kino-kino ki jingbit kiba ïadei ha ka liang ka ïoh kam ïoh jam sha ki briew kiba nabar Jylla, khamtam eh ha kaba ïadei bad ki kam ki jam ïa kiba ki trai-muluk ki lah ban trei hapoh ka distrik.
“Ngi ngeit skhem ba ki lad ïoh kam ïoh jam bad ki kam khaïi pateng hapoh ka distrik dei ban ailad shuwa sha ki nongshong shnong kiba dei ki trai muluk,” ong ka seng.
Ka JSU ka la ban jur ruh halor ka jingdonkam mardor ban tehlakam bad ban pynlong ka jingjurip bniah ïa baroh ki ‘license’ jong ki dukan, ban pynlong ïa ki jingkhynra bad ban pyndam noh ïa ki ‘license’ ïa kiba la suba leh thok.
Ka la ong ruh ba ka JHADC ka dei ban bthah halor ka jingdonkam ban wah ïa ki kyrteng jong baroh ki nongtrei bar jylla kiba trei ha kawei-pa-kawei ka dukan ne kino-kino ki kam khaïi pateng.
Kino-kino kiba ïaleh pyrshah ïa kane ka jingbthah, dei ban pynlong da ka jingkhmih bniah bad ban kyndang ïa kiba kum kine ki briew na ka Jylla lada kim lah ban pyni ïa ka thup ne ban ai ïa ki jingpynshisha, ong ka JSU.
Kumjuh ka JSU ka la dawa na ka JHADC ba ka dei ban khmih bniah bad ban shim ïa ki lad jingpynshitom pyrshah ïa ki ‘riew shimet kiba leh ‘Benami’ hapoh ki kyndon jong ka Benami Transactions (Prohibition) Act, 1998.
“Kano-kano ka jingpulom na ka liang ka JHADC ban shim ïa ki sienjam kiba tyngeh ïa ki ‘riew shimet kiba donkti ha ki kam ‘Benami’, na ka liang ka JSU kam banse ban shimkhia da lade ban rah ïa kane ka mat sha ka ïingkashari khnang ban ïoh ïa ka jingbishar hok pyrshah ïa kine ki kam be-aiñ,” maham ka JSU.
