Shillong, Ïaïong 16
U Symbud Myntri Rangbah ka Jylla ba khmih ïa ka tnat Pohïing (Police), Bah Prestone Tynsong, u la bthah ban pynkhlaiñ ïa ka jingpahara bad peitngor ha ki jaka khappud bad ka Bangladesh namar ka jingjur ka jingwan rung tuh ki nong Bangladesh sha ka Jylla.
U Symbud Myntri Rangbah u la pynpaw ïa ka jingsngewkhia kaba jur ïa ka jingrung tuh ki briew na Bangladesh shapoh u pud u sam ka Meghalaya bad ong ba kane ka dei ka kam kaba hap ban shim khia bha da ki pulit bad ki BSF.
Na ka liang u Bah Prestone ha ki khyndiat sngi ba la dep u la hiar sha thaiñ Garo Hills ban bishar kam bad ki heh pulit halor ka jinglong jingman ka aiñ ka kanun, khamtam ban ïada ïa ki khappud na ka jingwan rung ki briew na Bangladesh.
“Ngi la ïakren sani bha ïa ka kam ba ïadei bad ka jingwan rung be-aiñ ki briew na Bangla-desh, khamtam ba ha katei ka ri ka don ka jingkhih ka saiñpyrthei kaba jur bha,” u la ong haba kren ha ka Sngi Balang.
U la ong ba ka dei ka kamram jong ka Sorkar ban pynthikna ba kum kine ki kam rung be-aiñ kim dei ban jia namar ba don ki por ba ka jur bha ka jingrung tuh ki nong Bangladesh na katei ka thaiñ.
U Symbud Myntri Rangbah u la ïathuh ba ki pulit da ka jingïatreilang bad ki BSF kumjuh ka tnat Custom la lah ban pynthikna ban pynkut noh syndon ïa ka jingwan rung ki briew na Bangladesh.
“Ki pulit jong ngi, da ka jingïatreilang bad ki BSF kumjuh ka tnat Custom, ki la lah ban khanglad ïa ki briew kiba wan rung be-aiñ,” u la ong.
Na ka liang u Bah Prestone u la pyntip ruh ba u la bthah ïa ki pulit ban bteng ka jingpeitngor bad ban pynkhlaiñ ruh ïa ki lad pahara da kaba ïatreilang bad ki bor pahar ka Sorkar Pdeng ban pynthikna ka jingshngaiñ ha khappud bad ban khang syndon sbak ïa ka jingwan rung tuh na Bangladesh.
