Shillong, Ïaïong 16
U Symbud Myntri Rangbah ba khmih ïa ka tnat Pohïing (Police) ha ka Jylla, Bah Prestone Tynsong u la ong ba kino-kino ki briew kiba shah dawa pisa ha ki kynhun bad ki seng ki dei ban pyntip mar-mar sha ki pulit.
U la pyntip ba u la dep bthah ïa ki bor pynïaid district bad Superintendent of Police ba kin ïakren bad ki nongkhaïi, nongshong dukan baroh ym tang ha Ïewduh, hynrei ha baroh kawei ka Jylla ban pyntip sha ki bor ka aiñ lada ka don ka jingdawa pisa jubor.
“Ka aiñ ka don, nga la bthah ïa ki bor pynïaid district kynthup ïa u SP ba kin ïakren bad baroh ki nongkhaïi, ym tang ha Ïewduh hynrei ha baroh kawei ka Jylla, ba lada don kiba pan pisa ha ka kyrteng jingïarap (donation) lane ban pan jubor ïa ka pisa, kim dei ban artatien ban pyntip sha ki pulit khnang ban lah ban shim kam,” la ong u Bah Prestone haba kren bad ki lad pathai khubor ha ka Sngi Balang.
Kane ka jingkren u Symbud Myntri Rangbah ka long haba kylli halor ka jingpaw pyrthei ki slip lane ‘receipt’ lum pisa ha ka kyrteng ki sengbhalang ha ki rynsan social media ha ki khyndiat sngi ba la dep.
Kumba 12 tylli ki seng ki la paw kyrteng ha ka jingkhrong pisa be-aiñ na ki nongkhaïi ha Ïewduh, bad na kane ka jingdon kitei ki kynhun dawa pisa jubor ka la long kawei na ki daw jong ka jingkiew dor ki mar ki mata ha ïew, kaba pynduhnong pat ïa ki paidbah, khamtam ïa kito ki longïing kiba duna ka kamai kajih.
Na kine ki 12 tylli ki seng ba lum pisa ha Ïewduh, tang 3 tylli kiba la bna kyrteng bha, ba kynthup ïa ka Hynñiewtrep National Youth Front (HNYF), ka Hynñiewtrep National Youth Movement (HNYM), bad ka Hynñiewtrep Achik National Movement (HANM).
Kiwei pat ki seng ki bym ju bna kyrteng satia ki kynthup ïa ka Poor Peoples’ Movement (PPL), Khlur U Hynñiewtrep (KUP), Hynñiewtrep North Federation (HNF), Hynñiewtrep People Define Alliance (HPDA), Hynñiewtrep Khasi People Movement (HKPM), Hynñiewtrep People Youth Organisation (HPYO), ka Hynñiewtrep National Youth Council (HNYC), ka Hynñiewtrep Youth Federation (HYF) bad ka United Khasi Council (UKC). Haba kyntu ïa ki nongkhaïi bad nongdie dukan ba kin mih shakhmat ban pyntip lada don kita ki seng kiba dawa pisa jubor ha ka kyrteng pan jingïarap, u Symbud Myntri Rangbah u la ong ba ki nongkhaïi kim dei ban tieng ban pyntip, ha kaba ki lah ban shu phone ha u ’emergency number’ ki pulit ki ban shim khia ha kano-kano ka por ba ki ïoh ïa ka jingujor.
Na ka liang u Superintendent of Police ka East Khasi Hills, Bah Vivek Syiem ruh u la phah kajuh ka jingkyntu, ha kaba u la ong ba kum ki kam lum pisa ki dei kiba be-aiñ bad ym dei ban shim kum ki jingai jingïarap sngewbha.
U Bah Vivek u la kubur ba ki don ki nongkhaïi kiba sheptieng ban pyntip sha ki pulit bad kular ba ki pulit kin buhrieh ïa ki kyrteng jong kiba ai ïa ki jingtip.
U SP u la ong ruh ba kito kiba shah dawa ki lah ban shu ai tang ïa ki jingtip sha ki pulit ïa ka por bad ka jaka ba jia lada kim kwah ban ujor da ka ejahar.
